Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 160 Hüküm no: 154 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Onan zimmînin vefât eden Halil b. Mustafa’ya olan borcunu karısı Rukiye Hatun’a ödemesi Maʻrûz; Medîne-i Eyüb’de Defterdâr Kara Süleyman Mahallesiʼnde sâkin [iken] vefât eden Halil b. Mustafa’nın verâseti zevce-i menkūhası Rukiye Hatun ile sulbî sagīr oğlu İbrahim’e inhisârı tahakkukundan sonra sagīr-i mezbûrun vâlidesi ve tesviye-i umûruna vasiyesi bâʻisetü’l-iʻlâm mezbûre Rukiye Hatun meclis-i şerʻa ihzâr etdirdiği Onan ve Vartan zimmîler ile terâfuʻlarında mesfûr Onan zimmetinde müteveffâ-i mezbûrdan mevrûs bâ-temessük cihet-i karzdan üç yüz elli guruş hakkımız olup meblâğ-ı mezbûrun edâsına sahîha-i şerʻiyye ile babası hâzır bi’l-meclis mezbûr Vartan’a kefîl ve dâmin olmağla meblâğ-ı mezbûru asâleten ve vesâyeten taleb ederim deyü daʻvâ etdikde mezbûrlar dahi vech-i meşrûh üzere mukırr ve muʻterif olmalarıyla mûcebiyle meblâğ-ı mezbûr üç yüz elli guruşu mezbûre Rukiye Hatun’a edâ ve teslîme mesfûrân Onan ve Vartan zimmîlere tenbîh olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâmis aşer min-Rebîʻi’l-âhir sene sittin ve miʼe ve elf.