Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 162 Hüküm no: 158 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Hatun’un gece evine giren Kayıkcı Ali Beşe’nin cezalandırılması Maʻrûz; Medîne-i Eyüb’de Baba Haydar-ı Nakşibendî Mahallesi sâkinelerinden işbu bâʻisetü’l-iʻlâm Ümmü Gülsüm bt. Mustafa nâm hatun kolluk mübâşeretiyle medîne-i mezbûre mahkemesine ihzâr-ı şerʻ etdirdiği mahalle-i mezbûrede müsteciren sâkine Bursalı Kayıkcı Ali Beşe nâm kimesne muvâcehesinde mezbûr Ali Beşe târîh-i iʻlâm gecesi sâʻat üçde iken menzilim kapısına gelip duhûl kasdıyla kapımı depip beni tahvîf eyledikde ben dahi sayha eylediğimde firâr eyledi deyü baʻde’d-daʻvâ ve’l-inkâr müddeʻiye-i mezbûre Ümmü Gülsüm ber-vech-i muharrer müddeʻâsını mahalle-i mezbûre ahâlîsinden lede’t-tezkiye adâletleri zâhir olan İsmail b. Hasan ve Ömer Beşe b. Abdülgani nâm kimesneler şehâdetleriyle mezbûr Ali Beşe muvâcehesinde vech-i şerʻî üzere isbât etmeğin mûcebiyle mezbûr Kayıkcı Ali Beşe’ye şerʻan taʻzîr iktizâ eylediği bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-ışrîn min-Rebîʻi’l-âhir li-sene sittin ve miʼe ve elf.