Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 163 Hüküm no: 159 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Abdullah’ın vefât eden Süleyman b. Abdullah’dan alacaklı olduğu yolundaki iddiâsını ispatlayamadığı Maʻrûz; Mahmiye-i İstanbul’da Mehmed Ağa Mahallesiʼnde sâkin Musa b. Abdullah nâm kimesne bundan akdem vefât eden Süleyman b. Abdullah’ın sulbiye kebîre kızı ve zâtı baʻde’t-taʻrîfi’ş-şerʻî muʻarrefe olan bâʻisetü’l-iʻlâm Fâtıma Hatun ile terâfuʻlarında mezbûre Fâtıma Hatun’un babası müteveffâ-i mezbûr zimmetinde cihet-i karzdan otuz müdevver çarhlı İstanbul altunu hakkım olup kable’l-ahz fevt olmağla meblâğ-ı mezbûru terekesinden taleb ederim deyü daʻvâ eyledikde ol dahi meblâğ-ı mezbûru ve babası müteveffâ-i mezbûrun terekesine vazʻ-ı yed eylediğini inkâr etmekle müddeʻî-i mezbûrdan müddeʻâsına mutâbık beyyine taleb olundukda ityân-ı beyyineden izhâr-ı acz edip müddeʻî-i mezbûr Musa talebiyle merkūme Fâtıma Hatun tahlîf-i şerʻ olunup bilâ-beyyine bî-vech muʻârazadan menʻ olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ aşer min-Rebîʻi’l-âhıre sene sittin ve miʼe ve elf.