Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 166 Hüküm no: 167 Orijinal metin no: [18b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Süleyman’nın evlâd-ı vakıfdan olduğu iddiâsıyla Cami-i kebîr Mahallesi’ndeki menzilden hisse talebinde bulunmasının uygun olmadığı İʻlâmı mûcebince amel olunmak buyruldu Maʻrûz-ı dâʻî-i Devlet-i aliyyeleridir ki; Kasaba-i Tophâne’de İlyaszâde Mahallesi sâkinlerinden el-Hâc Süleyman b. Ömer nâm kimesne meclis-i şerʻ-i hatîrde zikr-i âtî vakıf menzile meşrûtiyyet üzere seksen seneden mütecâviz vâzıʻu’l-yed oldukları sâbit olan kendi nefsinden asıl ve karındaşı müteveffâ Molla Mehmed’in evlâd-ı sıgārı Ali ve Nefise’nin mansûb vasîleri işbu bâʻisü’l-iʻlâm eş-Şeyh Ahmed Efendi [b.] Sadi mahzarında medîne-i Hazret-i Ebâ Eyüb el-Ensârî’de Câmiʻ-i kebîr Mahallesiʼnde vâkiʻ maʻlûmü’l-hudûd zâviye taʻbîr olunur evlâd-ı evlâda meşrûta vakıf menzili mezbûr Şeyh Ahmed Efendi müteveffâ Molla Mehmed ve babaları Ali ve ceddimiz Mehmed Efendi bî-hak zabt ve tasarruf etmeleriyle müddet-i mezbûrede mürâʻât-ı hâtır içün daʻvâ olunmayıp sükūt etmiş idik. Ben dahi evlâd-ı vâkıfdan olmağla menzil-i mezbûrdan âid olan hissemi taleb ederim deyü eylediği takrîrine göre daʻvâ-yı mezkûre kırk seneden mütecâviz bilâ-özr terk olunup, kırk sene bilâ-özr terk olunan daʻvânın istimâʻı câiz olmadığını nâtık mezbûr Şeyh Ahmed Efendi fetvâ-yı şerîfe ibrâz etmeğin ber-mûceb-i fetvâ-yı şerîfe müddeʻî-i mezbûrun daʻvâsına iltifât olunmadığı bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-âşir min-şehri Rebîʻi’l-âhir li-sene sittin ve miʼe ve elf. El-abdü’d-dâʻî li’d-devleti’l-aliyyeti’l-Osmâniye Ebûbekir en-Nâib be-medîne-i Ebâ Eyüb.