Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 168 Hüküm no: 171 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin boşadığı karısı Fâtıma’ya mihr ve nafakasını ödemesi Maʻrûz; Medîne-i Eyüb el-Ensârî’de Ahmed Dede Mahallesi sâkinelerinden işbu bâʻisetü’l-iʻlâm Fâtıma bt. Ahmed nâm hatun zevc-i mutallıkı Mehmed Beşe nâm kimesne ile terâfuʻlarında zevcim mezbûr Mehmed Beşe talâk-ı selâse ile beni tatlîk etmekle zimmetinde mütekarrir olan yirmi beş guruş mehr-i müeccelim, nafaka-i iddet ve meʼûnet-i süknâm içün bi’t-terâzî takdîr olunan beş guruş ki; cemʻan otuz guruş hakkımı taleb ederim deyü daʻvâ etdikde mezbûr Mehmed Beşe ber-vech-i muharrer ikrâr ve iʻtirâf ve meblâğ-ı mecmûʻ-ı mezbûr otuz guruşu müddeʻiye-i mezbûre Fâtıma’ya edâ ve teslîme müteʻahhid olduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fi’l-yevmi’l-hâmis min-Cemâziyelevvel sene sittin ve miʼe ve elf.