Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 169 Hüküm no: 174 Orijinal metin no: [19a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Zaim Yahya Ağa’nın terekesinden bazı kıymetli eşyaların emanet edildiği Derviş Mehmed’in inkârı üzerine müteveffânın vârislerinin kendisiyle yirmi guruş karşılığında anlaştıkları Maʻrûz; Mahmiye-i İstanbul’da Hocapaşa Mahallesiʼnde sâkin iken bundan akdem fevt olan Zaim Yahya Ağa’nın sulbî sagīr oğlu Ahmed’in vâlidesi ve tesviye-i umûruna vasiyy-i mansûbesi Sâliha Hatun bt. Mehmed’in tarafından zikr-i âtî husûsda vekîl-i sâbitü’l-vekâlesi ve sagīr-i mezbûrun bâ-hüccet-i şerʻiyye nâzırı [sâhib-i] arzuhâl İsmail Ağa vekâleten ve kezâlik müteveffâ-i mezbûrun sulbiye sagīre kızları Hatice ve Fâtıma’nın vâlideleri ve tesviye-i umûrlarına vasîleri olup müteveffâ-i mezbûrun ümm-i veledi Âişe bt. Abdullah nâm hatun vesâyeten meclis-i şerʻ-i hatîrde derûn-ı arzuhâlde ismi mezkûr Eyyübî Derviş Mehmed nâm kimesne muvâcehesinde sagīrûn-ı mezbûrûnun babaları müteveffâ-i mezbûr Zaim Yahya Ağa’nın terekesinden on iki buçuk guruş kıymetli bir sim at hamâili ve yetmiş beş guruş [19b] kıymetli otuz aded sim fincan zarfı ve otuz guruş kıymetli bir çift simli piştov ve yüz guruş kıymetli bir vakıyye sim at başlığı ve elli guruş kıymetli bir çift altun yaldızlı sim üzengi ve iki yüz elli guruş kıymetli bir altun elmas yüzüğü işbu mezbûre Âişe mezbûr Derviş Mehmed’e bi-tarîkı’l-emâne vazʻ ve teslîm etmekle bi’l-vesâye ve’l-vekâle taleb ederiz deyü daʻvâ eylediklerinde ol dahi bi’l-külliye baʻde’l-inkâr müddeʻiyân-ı mezbûrân ber-vech-i muharrer müddeʻâlarını bir vechile beyân edemeyip ityân-ı beyyineden izhâr-ı acz etmeleriyle mezbûr Derviş Mehmed’e yemîn teklîf olundukda ol dahi yemîne meyl ve teveccühü müteʻayyin olmağla husûs-ı mezbûrda sulh sagīrûn-ı mezbûrûn haklarında nefʻ-i mahz olduğuna binâʼen vesâtet-i muslihîn ile mezbûr Derviş Mehmed ile an-inkâr yirmi guruş bedel-i makbûza sulh etdiklerinde onlar dahi nefʻan li’s-sıgār sulh-i mezbûru baʻde’l-kabûl mübâşiri Feyzullah Çavuş kulları iltimâsıyla huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’s-sâdis min-Cemâziyelevvel sene 1160