Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 170 Hüküm no: 175 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Mehmed’in karısı Fâtıma bt. Mustafa’ya olan borcunu ödemesi Maʻrûz; Medîne-i Ebâ Eyüb Ensârî’de Süleyman Subaşı Mahallesi sâkinelerinden bâʻisetü’l-iʻlâm Fâtıma bt. Mustafa b. Abdullah’ın vekîli olan Attâr Mehmed b. Ali nâm kimesne müvekkile-i mezbûrenin zevci olup ihzâr-ı şerʻ olunan Ahmed Efendi b. Mehmed muvâcehesinde müvekkilem mezbûre Fâtıma’nın cihet-i karz-ı şerʻîden bâ-temessük kırk guruş mezbûr Ahmed Efendi zimmetinde hakkı olmağla alıverilmesi matlûbumdur deyü bi’l-vekâle daʻvâ eyledikde ol dahi ber-vech-i muharrer ikrâr ve iʻtirâf etmeğin mûcebiyle meblâğ-ı mezbûr kırk guruşun edâsıyla iʻtirâfına binâʼen ilzâm olunup medîne-i mezbûre mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ min-Cemâziyelevvel sene 1160