Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 176 Hüküm no: 191 Orijinal metin no: [20b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Görgi’nin ölümüne sebep olduğu Ali’ye aid kara sığır ineğinin bedelini tazmin etmesi Maʻrûz; İşbu bâʻisü’l-iʻlâm Ali nâm kimesne medîne-i Eyüb mahkemesine ihzâr-ı şerʻ etdirdiği çoban tâifesinden Görgi nâm zimmî ile terâfuʻlarında mezbûr Görgi zimmîye bundan akdem ücret kavliyle raʻy içün teslîm eylediğim yirmi dört guruş kıymetli bir reʼs kara sığır ineğimi taʻaddî-i taksîrinden nâşî sahrâda bırakıp hâlik olmağla kıymetini taleb ederim deyü daʻvâ etdikde ol dahi ber-vech-i muharrer ve ikrâr lâkin zikr olunan sığırın kıymeti ancak on iki guruşdur deyü ziyâdeyi baʻde’l-inkâr mezbûr Görgi zimmînin ikrârı mertebesi olan on iki [21a] guruşu müddeʻî-i mezbûra edâ ve teslîme mezbûr Görgi’ye baʻde’t-tenbîh münkir olduğu on iki guruşu isbât içün müddeʻî-i mezbûr şâhide havâle olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâdî aşer min-Cemâziyelevvel sene sittin ve miʼe ve elf.