Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 177 Hüküm no: 192 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanko’nun Duvarcı Yanço’dan aldığı fazla parayı iâde etmesi Maʻrûz; Duvarcı zümresinden işbu hâmilü’l-iʻlâm Yanço nâm zimmî ihzâr olunan Yanko zimmî ile Eyüb mahkemesinde terâfuʻlarında bir sene bana hizmet etmek üzere otuz beş guruş ücret ile mesfûr Yanko nefsini îcâr etmiş iken hâlâ ücretinden on dokuz guruşu kabz ve diyâr-ı âhara gideceğim deyü müddetini tekmîlde taʻallül eder deyü iddiʻâ ve baʻde’l-münâzaʻa beynlerinde akd-i icârı rızâlarıyla feshettiklerinden sonra mesfûr Yanko zimmetinde şerʻan sâbit olan meblâğ-ı mezbûr on dokuz guruşun on üç guruşu hizmet eylediği müddetde müstehak olduğu ücretine takās mâʻadâ altı guruşu müddeʻî-i merkūm Yanço zimmîye edâya mesfûr Yanko zimmîye tenbîh olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâdî aşer min-Cemâziyelevvel sene sittin ve miʼe ve elf.