Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 177 Hüküm no: 193 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakomine ile Turfanda arasındaki ecr-i misil davasının sulh ile bitirildiği Maʻrûz; Hâmile-i arzuhâl Yakomine’nin zevci ve tarafından vekîli Yanaki nâm zimmî Eyüb mahkemesine ihzâr etdirdiği derûn-ı arzuhâlde mastûre Turfanda nâm Nasrâniye muvâcehesinde müvekkile-i mezbûre Yakomine müddet-i maʻlûmede eylediği ecr-i misli daʻvâsında iki guruş bedel-i makbûza sulh olup husûs-ı mezkûra müte‘alika âmme-i deʻâvîden merkūme Turfanda Nasrâniye ile oğulları gāʼibûn ani’l-meclis Toma ve Yanaki ve Lazari ve İspolat ve Dimitraki’den her birinin zimmetlerini ibrâ ve iskāt ve katʻ-ı nizâʻ eyledi dedikde ol dahi tasdîk ve medîne-i mezbûre mahkemesinde tescîl olunduğu mübâşiri İsmail Çavuş iltimâsı ile huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâlis aşer min-Cemâziyelevvel sene sittin ve miʼe ve elf.