Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 179 Hüküm no: 198 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ile Kayıkcı Mehmed arasındaki tarla davasının sâhib-i arz mahkemede olmadığı için neticeye bağlanamadığı Maʻrûz; Vilâyet-i Anadolu’da Kastamonu sancağında Ayandon kazâsına tâbiʻ Fayda nâm karye ahâlîsinden olup medîne-i Eyüb’de mutavattın Kayıkcı Mehmed nâm kimesne meclis-i şerʻde karye-i mezbûre ahâlîsinden işbu bâʻisü’l-iʻlâm İbrahim nâm kimesne muvâcehesinde mezbûr İbrahim karye-i mezbûrede vâkiʻ ta[pu] ile taht-ı tasarrufumda olan tarlamı diyâr-ı âhara gidip muʻattala kodu deyü sâhib-i arzdan tapu ile alıp zabt ve zirâʻat eder deyü tasaddî eylediği daʻvâsında sâhib-i arzın huzûru lâzım olup hâlâ mevcûd olmayıp hâzır olmamağla daʻvâları istimâʻ olunmadığı medîne-i mezbûre mahkemesende tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’s-sâdis aşer min-Cemâziyelevvel sene sittin ve miʼe ve elf.