Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 184 Hüküm no: 212 Orijinal metin no: [22b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Istabl-ı âmire ihtiyâcını karşılamak üzere Çekmece-i sagir nâhiyesine tâbi köylerden ücreti karşılığında yirmi beş araba ot taşınması Akzâ kuzâti’l-Müslimîn evlâ vülâti’l-muvahhidîn maʻdeni’l-fazl ve’l-yakīn râfiʻu aʻlâmü’ş-şerîʻati ve’d-dîn vârisü ulûmi’l-enbiyâ-i ve’l-mürselîn el-muhtass bi-mezîd-i inâyeti’l-Meliki’l-Muʻîn mevlânâ Hâslar kādısı −zîdet fezâiluhu− ve kıdvetü’n-nüvvâbi’l-müteşerriʻîn Çekmece-i sagīr nâhiyesi nâibi mevlânâ ( ) −zîde ilmuhu− ve mefâhirü’l-emâsil ve’l-akrân âʻyân-ı vilâyet iş erleri −zîde kadruhum− tevkīʻ-i refîʻ-i hümâyûn vâsıl olıcak maʻlûm ola ki; Istabl-ı âmiremde olan esbâna hâs ve taʻyînât-ı sâire verilmek içün mîrî çayırlardan kiyâh biçdirilip mîrî anbara naklolunmak içün Çekmece-i sagīr nâhiyesinden yirmi beş aded büyük ankışlı araba ihrâc olunagelmekle bin yüz altmış senesine mahsûb olmak üzere lâzım gelen ücretleri ber-vech-i peşin hâlâ otlak emîni olan ( ) −zîde mecduhu− tarafından verilmek şartıyla nâhiye-i mezbûreden ol mikdâr araba ihrâc ve mîrî otlağı mîrî anbara nakleylemeleri içün emr-i şerîfim verilmek bâbında iftihâru’l-emâcid ve’l-ekârim bi’l-fiʻil mirâhûr-ı evvel Durak −dâme mecduhu− iʻlâm etmeğin hazîne-i âmiremde mahfûz olan mevkūfât defterlerine nazar olundukda sene-i sâbıkāda mîrî çayırlardan anbar-ı âmireme nakl eylemek üzere Çekmece-i sagīr nâhiyesinden yirmi beş aded araba ihrâc ve nevbet ile nakl eylemek şartıyla Çatalca ve Miço çayırlarından naklolunacak otluk arabalarının beher arabasına yüz yirmişer ve Sazlıdere ve Filyoz ve Davudpaşa-yı atîk çayırlarından naklolunacak otlağın dahi arabasına seksener akçeden icâb eden ücretleri otlak emîni mûmâ-ileyh yedinden an-nakdin verilmek şartıyla nâhiye-i mezbûreden yirmi beş aded büyük ankışlı araba ihrâc ve mîrî otlak kaç nevbette tekmîl olur ise tamamen anbara nakl ve teslîm etdirilmek üzere emr-i şerîfim verildiği mukayyed bulunmağın imdi sâbıkı mûcebince Çatalca ve Miço çayırlarından naklolunacak otlak arabalarının her bir arabasına yüz yirmişer akçe ve Sazlıdere ve Filyoz ve Davudpaşa-yı atîk çayırlarından naklolunacak otlağın [23a] her bir arabasına seksener akçeden icâb eden ücretleri otlak emîni mûmâ-ileyh yedinden an-nakdin ashâbına verilmek şartıyla zikr olunan Çekmece-i sagīr nâhiyesinden yirmi beş aded büyük ankışlı araba ihrâc ve mîrî otlak kaç nevbetden tekmîl olunur ise tamamen anbar-ı âmireme nakl ve bir gün evvel ve bir sâʻat mukaddem teslîm-i anbar etdirdip işbu emr-i şerîf-i âlîşânıma mugāyir vazʻ ve hareketden ihtirâz olunmak bâbında fermân-ı âlîşânım sâdır olmuşdur buyurdum ki; hükm-i şerîfimle ( ) vardıkda bu bâbda vech-i meşrûh üzere şeref-refte olup hilâfıyla vazʻ ve hareketden be-gāyet ihtirâz eyleyesiz şöyle bilesiz alâmet-i şerîfime iʻtimâd kılasız. Fi’l-yevmi’s-sâdis aşer Cemâziyelûlâ li-sene sittin ve miʼe ve elf. Be-makām-ı Kostantıniyye İşbu sene-i mübârekede Istabl-ı âmire’de esbâna hâs ve taʻyînât-ı sâire içün mîrî çayırlardan biçdirilip anbar-ı âmireye nevbet ile naklolunacak kiyâh içün Çatalca ve Miço çayırlarından beher arabasına yüz yirmişer akçe ve Sazlıdere ve Filyoz ve Davudpaşa-yı atîk çayırlarından beher arabasına seksener akçeden icâb eden ücretleri otluk emîni fahrü’l-akrân ağa yedinden an-nakdin verilmek şartıyla Havâss-ı refîʻa muzâfâtından Küçükçekmece nâhiyesi matlûb, ihrâcı fermân buyrulan yirmi beş aded büyük araba bâ-fermân-ı âlî ve ber-muʻtâd tevzîʻ olunan defterdir ki ber-vech-i âtî zikr ü beyân olunur. Fi’l-yevmi’l-ışrîn min-Cemâziyelevvel sene sittin ve miʼe ve elf. Nefs-i Çekmece-i sagīr 1 Araba Yalnız bir arabadır Karye-i Tarakatye 1 Araba Yalnız bir arabadır Karye-i Katakule 1 Araba Yalnız bir arabadır Karye-i Mendos [Amindos] maʻa Firuz 1 Araba Yalnız bir arabadır Karye-i Anbarlı 1 Araba Yalnız bir arabadır Karye-i İspartukon 1 Araba Yalnız bir arabadır Karye-i Alibey maʻa Ermeni 1 Araba Yalnız bir arabadır Karye-i Galatarya 1 Araba Yalnız bir arabadır Karye-i Ankurye 1 Araba Yalnız bir arabadır Karye-i Benefşe 1 Araba Yalnız bir arabadır Karye-i Makrihorya 2 Araba İki arabadır Karye-i Ayastafanos 2 Araba İki arabadır Karye-i Ayapa maʻa Nifoz 1 Araba Yalnız bir arabadır Karye-i Litros 2 Araba İki arabadır Karye-i Halkalı 1 Araba Yalnız bir arabadır Karye-i Kiteli 2 Araba İki arabadır Karye-i Petnehor 1 Araba Yalnız bir arabadır Karye-i Ali Bey Piroliçe 1 Araba Yalnız bir arabadır Karye-i Hadim Yaylağı 2 Araba İki arabadır Karye-i Papas maʻa Bosna 1 Araba Yalnız bir arabadır Yekûn araba 25 Yirmi beş arabadır.