Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 186 Hüküm no: 213 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan v. Asador’un Ali Paşa Vakfı’ndan olup tasarrufunda bulunan tuğla ocağı ve harman yerini oğlu Angeliye kiraladığı Maʻrûz; Havâss-ı aliyye kazâsına muzâfe kasaba-i Hasköy’de mütemekkin Aleksan v. Asador nâm zimmî kebîr oğlu bâʻisü’l-iʻlâm Angeli nâm zimmî muvâcehesinde kasaba-i mezbûrede Abdüsselam Câmiʻ-i şerîfi kurbünde vâkiʻ merkūm Ali Paşa Vakfı’ndan olup hâlâ taht-ı tasarrufumda olan kiremid ve tuğla ocağım ile harman yerimi merkūm Angeli fuzûlî zabt eyledi deyü daʻvâ eyledi[ğimde] merkūm Angeli dahi mârru’z-zikr kiremid ve tuğla ocağı ile harman yerini merkūm Aleksan zimmî işbu bin yüz altmış senesinde vâkiʻ rûz-ı Hızır ibtidâsından bir sene tamamına değin üç yüz guruşa bana îcâr ve teslîm ben dahi ber-minvâl-i muharrer istîcâr ve kabûl edip ol vechile taht-ı icâremdedir deyü defʻini beynlerinde adâletleri zâhir olan Agop v. Karabet ve Petro v. Sakar nâm zimmîler şehâdetleriyle münkir-i merkūm Aleksan muvâcehesinde alâ-vech-i şerʻ isbât etmekle mûcebiyle merkūm Aleksan müddet-i madrûbe tamamına değin ocak ve harman yerine müdâhale etmemek üzere menʻ olunduğu Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’t-tâsiʻ aşer min-Cemâziyelevvel li-sene sittin ve miʼe ve elf.