Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 187 Hüküm no: 215 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Birbirleriyle kavga eden Rukiye ve Zeyneb isimli kadınların barıştıkları Maʻrûz; Mahmiye-i İstanbul’da Küçük Mustafapaşa Mahallesi’nde Kadıçeşmesi kurbünde sâkine Rukiye bt. Ahmed b. Abdullah’ın zevci ve tarafından zikr-i âtî husûsa vekîl olduğu zât-ı mezbûreyi bi’l-maʻrifeti’ş-şerʻiyye ârifân es-Seyyid Süleyman b. Ahmed b. Abdurrahman şehâdetleriyle vekâleti sâbit olan İbrahim Çelebi b. el-Hâc İsmail meclis-i şerʻde medîne-i Eyüb’de Musa Çavuş Mahallesiʼnde sâkine bâʻisetü’l-iʻlâm Zeyneb bt. Abdullah muvâcehesinde mezbûre Zeyneb târîh-i iʻlâmdan on beş gün mukaddem zevcem müvekkilem mezbûreye misâfereten geldiğinde birbirleriyle nizâʻları esnâsında merkūme Rukiye’nin kasığına mezbûre Zeyneb bi-gayr-ı hakkın depmesiyle darbından nâşî müstebînü’l-hilka cenîn ilkā edecek mertebede sâhibetü’l-firâş olmağla mûcib-i şerʻîsini bundan akdem merkūme Zeyneb’den daʻvâ etmiş idi. El-hâletü hâzihî zevcem müvekkilem mezbûre Rukiye daʻvâ-yı mezkûresinden meccânen fâriğa olup husûs-ı mezkûra ve mâ-yuhdesü minhe müteʻallika âmme-i daʻvâdan mezbûre Zeyneb’in zimmetini ibrâ ve iskāt eyledi deyü baʻde’l-ikrâr mezbûre Zeyneb dahi tasdîk eylediği baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-hâdî ve’l-ışrîn min-Cemâziyelevvel sene sittin ve miʼe ve elf.