Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 189 Hüküm no: 220 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Yasef’in Mirza isimli zimmînin küçük oğlu Avanes’i başından ve gözünden taşla yaraladığı Havâss-ı aliyye kazâsına tâbiʻ Hasköy mahallâtından Yenimahalle’de mütemekkin işbu bâʻisü’l-iʻlâm Mirzâ nâm zimmî Serrac Mehmed Haseki mübâşeretiyle medîne-i Eyüb mahkemesine ihzâr-ı şerʻ olunup cüssesinin bülûğa tahammülü olduğu hâlde on altı yaşında olduğunu ikrâr eden Yasef nâm Yahûdi muvâcehesinde mezbûr Yasef târîh-i iʻlâmdan bir gün mukaddem öğle vaktinde mahalle-i mezbûrede vâkiʻ dükkânda otururken oğlum işbu sagīr Avanes’in sol kaşından ve sağ kaşı üzerinden alnından muhadded [24a] olmayan taş ile amden bi-gayr-ı hakkın darb ve şec eyleyip andan nâşî sol gözü kapanmağla mûcib-i şerʻîsini taleb ederim deyü baʻde’d-daʻvâ mezbûr Yasef cevâbında fi’l-hakīka işbu sagīr-i mezbûr dükkânda oturur iken vakt-i mezbûrda âhara taş atarken hatâʼen taş işbu sagīr-i mezbûra isâbet eyledi deyü ikrâr ve iʻtirâf etmeğin cerh-i mezkûrun mûcib-i şerʻîsi berʼ-i tâm husûlüne tevkīf olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. [Fî] selh-i Cemâziyelevvel sene 1160