Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 190 Hüküm no: 222 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konevî Mehmed b. Ahmed’in Yusuf b. Abdullah’a olan borcunu ödemesi Maʻrûz-ı dâʻî-i Devlet-i aliyyeleridir ki; İşbu bâʻisü’l-iʻlâm Yusuf b. Abdullah nâm kimesne Eyüb mahkemesine ihzâr etdirdiği Kaymakcı Konevî Mehmed b. Ahmed ile terâfuʻlarında mezbûr Mehmed zimmetinde cihet-i karz-ı şerʻîden bâ-temessük seksen beş guruş hakkımı taleb etdikde edâda taʻallül eder alıverilmek murâdımdır deyü daʻvâ etdikde mezbûr Mehmed ber-vech-i muharrer ikrâr lâkin müddeʻî-i mezbûr bilâ-devr-i murâbaha deyü yedimden altmış yedi guruşunu ahz etmiş idi deyü defʻe tasaddî eyledikde müddeʻî-i mezbûr Yusuf ancak on guruş kabzını ikrâr mâʻadâsını inkâr etdikde mezbûr Mehmed defʻini isbâtdan acz ve talebiyle müddeʻî-i mezbûr Yusuf baʻde’t-tahlîf mûcebiyle meblâğ-ı mezbûr seksen beş guruşun on guruşu bilâ-devr ahz eylediği on guruşa mahsûb olup bâkī yetmiş beş guruş müddeʻî-i mezbûr Yusuf’a edâ ve teslîm eylemek üzere mezbûr Konevî Mehmed’e tenbîh-i şerʻî olunduğu baʻde’t-tescîl mübâşiri Hüseyin Çukadâr iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî gurre-i min-Cemâziyelâhir li-sene sittin ve miʼe ve elf.