Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 191 Hüküm no: 223 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb’deki çömlekci esnâfının kethüdâ vekilliğine Ali Beşe’nin yerine Halil Çelebi’nin getirildiği Maʻrûz; Medîne-i Ebâ Eyüb el-Ensârî’de vâkiʻ çömlekci esnâfından müseccelü’l-esâmî ustaları meclis-i şerʻ-i hatîrde esnâf-ı mezbûr üzerlerine hazîne-mânde etmeği mukābili berât-ı şerîf-i âlîşân ile kethüdâmız olan sâhib-i arzuhâl İbrahim tarafından umûr-ı kethüdâlığı görmeye tevkîl eylediği Ali Beşe nâm kimesne baʻde’l-ihzâr mezbûr Ali Beşe beyne’l-hıref nizâma mugāyir ve hilâf-ı muʻtâd haraketinden müteezzîlerdir deyü vekâletden ihrâc ve umûr ve husûslarına karışmamak üzere tenbîh olunmasın taleb ve iltimâslarına binâʼen mezbûr Ali Beşe vekâletden ihrâc ve umûrlarına müdâhale eylememek üzere menʻ ve tenbîh olundukdan sonra kethüdâ-yı mezbûr İbrahim kadîmden kethüdâlara mahsûs beyʻ olunagelen çamuru kendisi bi-nefsihî âhara beyʻ edip çamur beyʻinden mâʻadâ esnâf-ı mezbûrenin düşen umûr ve husûslarına rüʼyet etmek üzere cümle maʻrifetiyle işbu Halil Çelebi’yi tarafından tevkîl ol dahi kabûl ve kemâ-yenbagī görmeye taʻahhüd edip bu vechile tescîl olunduğu huzûr-ı âlîlerine iʻlâm olundu. Fi’l-yevmi’r-râbiʻ aşer min-Cemâziyelevvel sene sittin ve miʼe ve elf.