Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 192 Hüküm no: 226 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzile yapılan ilâvenin kaldırılması Maʻrûz; Sâdır olan fermân-ı âlîleri üzere cânib-i şerʻden irsâl olunan Başkâtib Mehmed Efendi’nin hassa miʻmârlarından el-Hâc Süleyman ve Halil ve Ali nâm halîfeler ile merhûm firdevs-mekân Dâmad Mustafa Efendi hazretlerinin medîne-i Eyüb el-Ensârî’de Nişancı Paşa Mahallesi’nde Nakşibendî fukarâsına meşrûta türbe-i şerîfleri evkāfı musakkafâtından derûn-ı arzuhâlde mezkûr Sütlüce’de vâkiʻ mahâll-i nizâʻın üzerinde akd eylediği meclis-i şerʻde işbu hâzırlar olan Gül Nasrâniye ile zevci Vartan nâm Ermeninin müşâhereten müstecir olduğu bir bâb vakıf menzilin icâreteyn ile mutasarrıfesi olan Afife nâm hatun kezâlik muttasılında vâkiʻ işbu hâzır bi’l-meclis Perapiyon Nasrâniye’nin müşâhereten müsteciresi olduğu vakf-ı mezbûrdan bir bâb menzilin icâreteyn ile mutasarrıfı Mehmed nâm müteveffânın evlâd-ı sıgārının vâlideleri ve vasiyeleri olan Zeyneb Hatun bt. Abdullah b. Abdullah tarafından vekîli Ahmed Odabaşı ile mütevellî-i vakfın müseccel vekîli Molla Halil hâzır olduğu hâlde terâfuʻlarında baʻde’n-nazar ve’l-keşf hulefâ-i miʻmârûn-ı mezbûrûnun misâhaları üzere mezbûre Afife tasarrufunda olan menzilinin suyu cereyân eylediği arzen bir zirâʻ altı parmak saçak ve beş aded pencereleri kadîm olmağla bundan akdem mütevellî-i vakf taraflarından zikr olunan saçak katʻına ve pencerelerin seddetmemek üzere müşâhereten müstecire olan mesfûre Perapiyon’a defâʻat ile tenbîh olunmuş iken ısgā etmeyip mütevellîsi ve mutasarrıfesi izinlerinsiz arzen bir zirâʻ altı parmak kadîm saçağı fuzûlî katʻ ve suyu cereyân eden saçak yerini tegallüben ahz ve üzerine binâ ihdâs ve dört pencerelerini sedd menziline zam ve idhâl eylediği şuhûd-ı udûlle isbât ve zâhir olmağla mesfûre Perapiyon tegallüben ahz eylediği ol mikdâr zirâʻ arsada ihdâs olan ebniyesinin refʻi ve vakfa muzır olmamağla reʼy-i mütevellî ile refʻi ve zararın defʻa mahallinde tenbîh eylediğini mevlânâ-yı mezbûr vâkiʻ hâli baʻde’t-tahrîr ve’l-inhâ tenfîz olunmağın mûcebince emr-i âlîleri sudûru bâbında huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 2 ( ) sene sittin ve miʼe ve elf.