Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 194 Hüküm no: 229 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zal Paşa Camii’ne âid odalarda ikâmet edip uygunsuz davranışlarda bulunan talebelerin belirlenmesi İzzetlü yeniçeri ağası ve Haslar nâibi efendi ve Haslar ustası, Hazret-i Ebâ Eyüb el-Ensârî’de vâkiʻ Zal Paşa Câmiʻ-i şerîfi hareminde olan odalarda sâkin tâliblerden baʻzıları kendi hâllerinde olmayıp erâzil ve eşhâs makūleleriyle ülfet ve cemʻiyyet ve eyyâm ve leyâlîde şâbb-ı emred gulâm ve avratları odalarına getirip âmîzeş ve ihtilâta cesâret ve envâʻ-ı fısk u fesâd îkāʻına cüret eyledikleri cihetden ol makūle şekāvet-pîşeler kimler ise maʻrifet-i şerʻle tefahhus ve alâ-eyyi hâlin ahz ve ele getirilip huzûrumuza ihzârlarıyla tâlibe-i ulûma makarr ve meʼvâ olan odaların tathîr ve tanzîfi bâʻis-i ucûr-ı cezîle olacağı vâzıh ve âşikâr olmağla imdi sâlifü’z-zikr odalarda sâkin ve mütemekkin olup talebe-i ulûm zümresinden bu makūle fesâd ve şenâʻate ictirâ edenleri alâ-vechi’t-tahrîr teftîş ve tefahhus ve bi-eyy-i vechin kân ahz ve ele getirip isim ve resimleri ve vilâyetleri tasrîh ile huzûrumuza irsâl ve iʻlâma mübâderet ve kendi hâllerinde istifâde ile meşgūl olup bu misillü fezâhat ve kabâhati olmayanlar var ise onlar dahi isimleriyle başka defter ve defteri irsâl ile zikr olunan odaların tathîrine ihtimâm ve dikkat ve izhâr-ı tekâsülden ittikā ve mücânebet eyleyesiz deyü buyruldu. Fî 8 C sene [1]160 Bende Hasan Efendi Kâtib-i ocak