Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 194 Hüküm no: 230 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bir araba içinde cesedi bulunan Papa Kostantin’e yapılan muâyene sonucu yara ve darb izine rastlanmadığı Maʻrûz-ı dâʻî; Sâdır olan fermân-ı âlîleri üzere cânib-i şerʻ-i hatîrden mürsel Hüseyin Efendi dâʻîleri ve bostancıbaşı ağa hazretleri taraflarından mübâşir taʻyîn olunan Çukadâr Mehmed ile Havâss-ı aliyye kazâsına tâbiʻ Ayastanafos nâm karye ile baruthâne beyninde Kovalık nâm mahalde bir araba içinde hâlik ve araba içinde yatar Papa Kostantin nâm zimmînin lâşesi üzerine varıp hâlik-i mersûmun sulbî kebîr oğlu Yanako nâm zimmî hazır olduğu hâlde Müslimîn ile âʻzâsına baʻde’n-nazar uzvuna aslâ eser-i cerh ve hank olmayıp matʻûnen araba içinde hâlik ve mevcûd olduğu mevlânâ-yı mezbûr vâkiʻ hâli mahallinde baʻde’l-muʻâyene ve’l-keşf ba‘dehû maʻan baʻs olunan ümenâ-i şerʻle meclis-i şerʻa gelip inhâ ve takrîr eylediği huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 8 min-Cemâziyelâhir sene 1160