Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 195 Hüküm no: 232 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb’deki Zal Paşa Cami odalarında ikâmet eden talabelerden uygunsuz davranışlarda bulunmayanların isimleri Medîne-i Hazret-i Ebâ Eyüb el-Ensârî’de vâkiʻ Zal Paşa Câmiʻ-i şerîfi hareminde olan odalarda sâkin tâliblerden baʻzıları kendi hâllerinde olmayıp erâzil ve eşhâs makūleleriyle ülfet ve cemʻiyyet ve eyyâm ve leyâlîde şâbb-ı emred ve gulâm ve avratları odalarına getirip âmîzeş ve ihtilâta cesâret ve envâʻ-ı fısk u fesâd îkāʻına cüret eyledikleri cihetden ol makūle şekāvet-pîşeler maʻrifet-i şerʻle alâ-vechi’t-tahrîr teftîş ve tefahhus ve bi-eyy-i vechin kân ahz ve ele getirip isim ve resimleri ve vilâyetleri tasrîhiyle huzûr-ı âlîlerine irsâl olunmak bâbında izzetlü yeniçeri ağası hazretlerine ve Haslar ustası kullarına ve bu fakīre hitâben şeref-bahş-ı vürûd eden musahhah fermân-ı âlîleri mübâşir taʻyîn buyrulan kapı yazıcısı Hasan Efendi ve Çukadâr el-Hâc Mehmed kulları yediyle medîne-i mezbûre mahkemesine vusûlünde zikr olunan odalarda sâkin talebe-i ulûm meclis-i şerʻa ihzâr ve muvâcehelerinde feth ve kırâet ve mazmûn-ı emr-i âlîleri her birine tefhîm ve imtisâlen li’l-emri’l-âlî cânib-i şerʻ-i hatîrden mürsel Kâtib Mehmed Efendi dâʻîleri ve mübâşir-i merkūm Hasan Efendi ve çukadâr-ı merkūm el-Hâc Mehmed Ağa ve Eyüb ustası ve Eyüb çorbacısı ağa kulları ile maʻan zikr olunan odalara varıp baʻde akdi’l-meclis alâ-vechi’t-taharrî teftîş ve tefahhus eyledikde kurb ve civârda olan ahâlî-i mahallenin hüsn-i hâllerine şehâdet eyledikleri ifâde ve istifâdeye meşgūl olan talebe-i ulûmun isim ve resimleri defteridir ki; ber-vech-i âtî zikrolunur. Fi’l-yevmi’l-âşir min-Cemâziyelâhir li-sene sittin ve miʼe ve elf. Mukayyid vekîli Eyyübî Fesadoğlu el-Hâc Ali, Harpûtî es-Seyyid Mehmed, Güzelhisârî Hattat Ali Efendi, İmam vekîli Eyyübî es-Seyyid Mehmed Emin Efendi, Güzelhisârî es-Seyyid Mustafa Efendi, Nevşehirli Molla Ali, Erzurumlu el-Hâc Hasan, Kütahya’dan Molla Ali, Câmiʻ-i mezbûr Kayyımı el-Hâc Ahmed’in oğlu Süleyman, Torbalı-yı Göynük’den Ahmed Efendi, Bevvâb Molla Ali, Türbedâr-ı Eyyübî Molla İsmail, Hezargrad’dan Molla Salih, Milas’dan Halil Efendi, Bursevî Ebûbekir Efendi ve çömezi Molla Ahmed, Malatya’dan Mehmed Efendi, Alâiye’den Hasan Efendi, Alaşehir’den el-Hâc Ömer Efendi ve karındaşı Halil ve çömezi Molla Ahmed, Sâbıkā imam vekîli el-Hâc Ahmed Efendi, Malatya’dan diğer Mehmed Efendi, Kengirili (Çankırı) Kadı Ali Efendi, Ahıska’dan Molla Hüseyin, Bayındır’dan Molla Halil, Ahıska’dan Molla Halil, Ahıska’dan Molla Mehmed Darende’den Mehmed Efendi. Sah.