Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 196 Hüküm no: 234 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görice kazasından olup Eyüb’e mumculuk yaparken ölen İstavri v. Duba v. Peno’nun terekesinin taksiminde çıkan anlaşmazlığın giderilmesi Maʻrûz; Vilâyet-i Rumeli’nde Görice kazâsına tâbiʻ Pesitoh nâm karye mütemekkinelerinden bâʻisetü’l-iʻlâm Maro bt. Duba v. Koloş nâm Nasrâniye tarafından ber-vech-i âtî vekîl olduğunu iddiʻâ eden Despino bt. Petro nâm Nasrâniye Vâlidesarayı ser-bölüğü mübâşeretiyle medîne-i Eyüb mahkemesinde ihzâr-ı şerʻ etdirdiği Pano v. Peno nâm zimmî muvâcehesinde müvekkilim mezbûre Maro vilâyet-i merkūmede karye-i mezbûre ahâlîsinden olup Medîne-i Eyüb’de mumhânede mumcu iken bundan akdem hâlik olan İstavri v. Duba v. Koloş nâm zimmînin li-ebin kız karındaşı ve hasran vârisesi olmağla terekesine vâzıʻu’l-yed olanlardan taleb ve daʻvâ ve ahz ü kabza ve kendine irsâl ve îsâle ve bunlar mütevakkıf olduğu umûrun küllisîne işbu yedimde olan Görice Nâibi İsmail Efendi’nin imzâ ve hatemini hâviye hüccet-i şerʻiyye nâtık olduğu üzere tarafından beni vekîl ve nâib-i menâb nasb u taʻyîn ben dahi ber-vech-i muharrer vekâlet-i merkūmeyi baʻde’l-kabûl hâlik-i merkūmun terekesinden merkūm Mano zimmî hâlik-i mezbûrun mukırrun-leh bi’n-neseb cihetinden vârisi olmak üzere kabz eylediği yedi yüz altmış iki buçuk guruş ve yedi parayı bi’l-vekâle taleb ederim deyü baʻde’d-daʻvâ mezbûr Pano cevâbında fi’l-hakīka müvekkile-i mezbûre hâlik-i mezbûrun li-ebin kız karındaşı olduğunu ve kendi cihet-i merkūmeden hasran vârisi olmak üzere hâlik-i mersûmun terekesinden yedi yüz altmış iki buçuk guruş ve yedi para kabzını ikrâr ve iʻtirâf edip lâkin mezbûre Despino Nasrâniye’nin ber-vech-i muharrer vekîl olduğunu baʻde’l-inkâr müddeʻiye-i vekîl-i mezbûre Despino müddeʻâsını lede’t-tezkiye adâletleri zâhir olan Süleyman b. Fazlı ve diğer Süleyman b. Ali nâm kimesneler şehâdetleriyle ber-vech-i muharrer vech-i şerʻî üzere mezbûr Pano zimmî muvâcehesinde isbât etmeğin mûcebiyle baʻde’l-hükm ve’t-tenbîh medîne-i mezbûre mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Fi’l-yevmi’t-tâsiʻ min-Cemâziyelâhir li-sene sittin ve miʼe ve elf.