Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 198 Hüküm no: 237 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavga eden Çiftci Kirkor v. Haçador ile Rençber tâifesinden İbrahim b. Ahmed ve Bestan zimmînin birbirleri aleyhine açtıkları davalardan vazgeçtikleri Maʻrûz; Çiftçi tâifesinden hâmilü’l-iʻlâm Kirkor v. Haçador meclis-i şerʻde rençber tâifesinden İbrahim b. Ahmed ve Bestan v. Avanes muvâcehelerinde mezbûr İbrahim târîh-i iʻlâmdan bir gün mukaddem Çırpıcı çayırında buğday tarlama girip biçmek esnâsında iken vâkıf olduğumda menʻ murâd eylediğimde üzerime hücûm ve bi-gayr-ı hakkın sopa taʻbîr olunur âlet ile sol kaşım üzerine darbeyledi deyü mezbûr İbrahim’den mûcib-i şerʻîsini daʻvâya tasaddî eylediğimde ol dahi mahâll-i merkūmda sağ omuz başına ve sol koluma sopa ile ve mezbûr Bestan zimmî dahi kamçı ile sağ gözüme bi-gayr-ı hakkın darbeyledi deyü mezbûrândan her biri mûcib-i şerʻîlerini benden daʻvâya tasaddî eylediklerine binâʼen tasaddî eylediğimiz daʻvâlarımızdan rücûʻ ve birbirimizin [26b] zimmetlerini ibrâ ve katʻ-ı nizâʻ eyledik dedikde onlar dahi ber-vech-i muharrer baʻde’l-ikrâr ve’t-tasdîk Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâmin min-Cumâdelâhir li-sene sittin ve miʼe ve elf.