Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 204 Hüküm no: 250 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eceliyle ölen Vişbo zimmînin terekesinden olup Yuvan zimmî elinde kalan meblâğın vârislerine iâdesi Maʻrûz; İşbu hâmilü’l-iʻlâm Mihal v. Yuvan nâm zimmî bahçıvan tâifesinden ihzâr olunan Yuvan nâm zimmî ile terâfuʻ etdikde mûrisim Vişbo nâm hâlikin terekesinden işbu mesfûr Yuvan ahz eylediği nakd yüz elli guruşdan lâşesi mesârifi ihrâcından sonra bâkī yüz yirmi guruş mesfûr Yuvan zimmetinde kalıp ben hâlik-i mesfûrun li-ebeveyn karındaşı olduğum vechile verâseti bana ve sulbiye kızı Masline’ye münhasıra olmağın bâkī kalan meblâğ-ı mevrûs-ı mezbûrun nısfı altmış guruş bana isâbet etmekle taleb ederim mesfûr Yuvan’dan baʻde’d-daʻvâ ol dahi ber-vech-i muharrer verâset ve deyn-i mezbûru ikrâr ve iʻtirâf etmeğin mûcebiyle edâsına tenbîh-birle Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî gurre-i Recebi’l-ferd sene sittin ve miʼe ve elf.