Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 204 Hüküm no: 251 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aralarındaki alacak verecek davası bittiği için Mustafa Ağa’nın İmam Ömer Efendi’yi rahatsız etmeye hakkının olmadığı Maʻrûz; Medîne-i Eyüb el-Ensârî’de Çavuş Kasım Mahallesi sâkinlerinden Mustafa Ağa nâm kimesne Eyüb mahkemesine ihzâr olunan Evlice Baba Mescid-i şerîfi imamı işbu bâʻisü’l-iʻlâm Ömer Efendi ile terâfuʻlarında mülküm olup yüz on guruş kıymetli bandol sâʻat ve bir tüfengimi bir buçuk sene mukaddem maʻlûmu’l-mikdâr deynim mukābelesinde mezbûr Ömer Efendi yedine rehin vazʻ u teslîm etmiş idim hâlâ deynimi edâ edip zikr olunan erhânımı taleb ederim deyü mezbûr Ömer Efendi’den daʻvâ etdikde ol dahi müddeʻî-i mezbûr zimmetinde bâ-iʻlâm mahkûmün-bih hakkımı târîh-i iʻlâm senesi Cumâdelâhiresi’nin on dördüncü günü müddeʻî-i mezbûr Mustafa Ağa’dan ahz eylediğim esnâda rehni olmak üzere benden kabz etdiği tüfenkden mâʻadâ hakkım ve rehnim kalmayıp âmme-i deʻavî ve mutâlebâtdan benim zimmetimi şuhûd muvâcehelerinde ibrâ-i âmm ile ibrâ eyledikde ben dahi ibrâ-i mezbûru kabûl ve âmme-i deʻâvîden müddeʻî-i mezbûrun zimmetini ibrâ etmişdim deyü eylediği defʻ-i mezbûresi meclis-i şerʻa ikāmet eylediği şuhûd-ı udûlden Debbağ Ahmed Ağa b. el-Hâc Mehmed ve Berber Halil b. el-Hâc İbrahim ve Mehmed Beşe b. Süleyman nâm kimesneler şehâdetleriyle münkir-i müddeʻî-i mezbûr Mustafa Ağa muvâcehesinde vech-i şerʻî üzere isbât etmeğin mûcebiyle müddeʻî-i mezbûr Mustafa Ağa merkūm İmam Ömer Efendi ile bî-vech muʻârazadan menʻ olunup tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin ve’l-ışrîn min-Cemâziyelâhir sene sittin ve miʼe ve elf.