Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 206 Hüküm no: 255 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıklı Ayazma yakınlarında cesedi bulunan maktulün kardeşi olduğunu iddiâ eden Ebûbekir’in açtığı davanın kabul edilmediği Maʻrûz; Sâdır olan fermân-ı âlîlerine imtisâlen taʻyîn buyrulan Abdullah Haseki maʻrifetiyle keşif iʻlâmı mantûku üzere Balıklı Ayazma kurbünde maktülün bulunduğu mahallin kurb ve civârında olanlardan husûs-ı katl teftîş ve tefahhus olundukda İmamoğlu Hüseyin’in çiftliği müstecirleri ve el-Hâc Hasan’ın harmanı ameleleri feryâd işitip vardığımızda ismi maʻlûmumuz olmayan maktūlü mahâll-i mezbûrda yatar bulup kātili firâr eylemiş deyü ihbâr çiftlik müstecirleri ve harman ameleleri üzerlerine madde-i katl müteʻayyin olmadığından mâʻadâ kātil-i mezbûr karındaşı olduğunu iddiʻâ eden vilâyet-i Anadolu’da nefs-i Akrar? ahâlîsinden Ebûbekir nâm şâbb-ı emred dahi maktûlün babası Ali ve anası Âişe vilâyetde mevcûdlar olduğunu iʻtirâf edip lâkin hâzırân olmamalarıyla ben karındaşım kurb ve civârda bulunan çiftlik-i merkūm müstecirleri ve harman ameleleri firâr eden kātili bulsunlar deyü eylediği takrîri üzere vârisi olmayıp daʻvâya ehliyeti olmadığından daʻvâ-yı mezbûresi dahi şerʻan mesmûʻa olmadığı huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâmis aşer min-Recebi’l-ferd sene sittin ve miʼe ve elf.