Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 208 Hüküm no: 261 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin boşadığı karısı Râbia’ya mihrini ödemesi Maʻrûz; Medîne-i Eyüb’de İslâmbey Mahallesiʼnde sâkine işbu bâʻisetü’l-iʻlâm Râbia nâm hatun zâtı baʻde’t-taʻrîfi’ş-şerʻî meclis-i şerʻ-i hatîrde zevc-i mutallıkı Ali Çelebi nâm kimesne muvâcehesinde mezbûr Ali Çelebi zevcim olup târîh-i iʻlâmdan üç buçuk ay mukaddem beni tatlîk etmeğin zimmetinde mütekarrir ve maʻkādün-aleyh olan iki bin akçe mehr-i müeccelimi taleb ederim deyü baʻde’d-daʻvâ mezbûr Ali Çelebi cevâbında mezbûr Râbia Hatun zevcesi olduğunu ikrâr lâkin târîh-i mezbûrda hîn-i tatlîkinde mehr-i mezbûrûnu kendine tamamen defʻ u teslîm ol dahi baʻde’l-ahz ve’l-kabz mehr-i mezbûra müteʻallika âmme-i deʻâvîden zimmetimi ibrâ ve iskāt eyledi deyü baʻde’d-defʻ ve’l-inkâr d[â]fiʻ-i mezbûr Ali Çelebi defʻ-i mezkûrunu beyân edemeyip yemîne dahi tâlib olmamağla meblâğ-ı mehr-i mezbûr iki bin akçeyi mezbûre Râbia Hatun’a edâ ve teslîme mezbûr Ali. Çelebi’ye tenbîh olunduğu Eyüb mahkemesinde tescîl olunup bi’l-iltimâs huzûr-ı [âlîlerine iʻlâm olundu].