Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 209 Hüküm no: 263 Orijinal metin no: [28b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’a vefât eden vâlidesi Safiye’den intikal eden ve Mehmed’in tasarrufunda olan evden hisse talep etmesinin zaman aşımı nedeniyle dikkate alınmadığı Maʻrûz; Sâhibe-i arzuhâl Âişe nâm hatunun zevci ve tarafından sâbitü’l-vekâle vekîli Mustafa nâm kimesne meclis-i şerʻde derûn-ı arzuhâlde zikr olunan Merkezefendi Mahallesiʼnde vâkiʻ mülk menzile bâ-hüccet-i mübâyaʻa vâzıʻu’l-yed olduğu müteʻayyin olan Mehmed nâm kimesne muvâcehesinde mezbûr Mehmed’in zabtında olan menzil müvekkilem mezbûre Âişe’nin vâlidesi Safiye nâm hatunun mevrûsu olup mezbûre Safiye Hatun fevt oldukda kızı müvekkilem mezbûre Ayşe’ye ve babası İbrahim’e müntakil ve mevrûs iken müteveffiye-i mezbûre Safiye Hatun otuz sene ve müvekkilem mezbûre babası hâtırı içün on dört sene menzil-i mezbûru daʻvâ etmeyip sükūt etmişler idi. Hâlâ müvekkilem mezbûre Âişe menzil-i mezbûrdan hissesini talep eder deyü bi’l-vekâle eylediği takrîre göre müvekkile-i mezbûre ve vâlidesi Safiye müddet-i mezbûrede daʻvâ eylemeyip sükūt etmeleriyle şerʻan daʻvâsı mesmûʻa olmamağla vekîl-i mezbûrun daʻvâsına iltifât olunmadığı tescîl olunup huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ aşer min-Recebi’l-ferd sene sittin ve miʼe ve elf.