Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 210 Hüküm no: 264 Orijinal metin no: [28b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in Emetullah bt. Mustafa’ya çeyiz olarak verdiği eşyaların iâdesi talebinde bulunmasının kabûl edilmediği Maʻrûz; Medîne-i Eyüb’de Sofular Mahallesiʼnde sâkine Âişe bt. İbrahim nâm hatun meclis-i şerʻde kızı bâʻisetü’l-iʻlâm Emetullah bt. Mustafa nâm hatun muvâcehesinde mezbûre Emetullah yedinde olan yedi yastık ve üç minder ve bir döşek ve iki yan keçesi ve bir orta keçesi ve iki yorgan ve iki tencere ve sagīr ve kebîr on sahan ve bir leğen ve ibrik ve bir sini ve bir hamam tası ve bir sandık ve bir çarşeb benim mülküm olup hâlâ mevcûd olmağla taleb ederim deyü daʻvâ etdikde mezbûre Emetullah dahi eşyâ-i muharrere-i mezkûreyi bana cihâz olmak üzere hîbe ve teslîm ben dahi meclis-i hîbede ittihâb ve kabûl edip ol vechile mülk-i mevhûbumdur deyü defʻini müddeʻiye-i merkūme Âişe mukırra ve muʻterife olmağla mûcebiyle eşyâ-i muharrere-i mezkûre mütâlebesinden menʻ olunduğu medîne-i mezbûre mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî ve’l-ışrîn min-Recebi’l-ferd sene sittin ve miʼe ve elf.