Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 324 Hüküm no: 508 Orijinal metin no: [52a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halıcıoğlu Ahmed’e borcu olanların vârislere ödeme konusunda anlaştıkları Maʻrûz-ı dâʻî-i Devlet-i aliyyeleridir ki; Fermân-ı âlîleri üzere Çarşamba günü dîvân-ı sadr-ı âlîde ba‘dehû Eyüb mahkemesinde meclis-i şerʻ-i hatîrde derûn-ı arzuhâlde mezkûrü’l-ism Halıcıoğlu Ahmed nâm müteveffânın veresesinden sulbiye-i kebîre kızları olan Hatice nâm hatun asâleten ve kızı Sâliha nâm hatunun zevci ve tarafından sâbitü’l-vekâle vekîli Süleyman nâm kimesne vekâleten Havâss-ı refîʻa kazâsı muzâfâtından Terkos nâhiyesine tâbiʻ Yeniköy ahâlîlerinden sâhibûn-ı arzuhâl Panayot ve Komine ve Hırsofa ve Aleksi ve Dimitri ve Foti nâm zimmîler muvâcehelerinde her biri âharın zimmetlerine lâzım gelen meblâğa bi’l-emr ve’l-kabûl kefîl ve zâmin olmak üzere birbirlerinin kefâletleriyle mesfûrûn ve sâirleri babamız müteveffâ-i mezbûrdan sıhhatinde cihet-i karz-ı şerʻîden istikrâz ve kabz ve mesâriflerine sarf ile istihlâk ve ol vechile zimmetlerinde olan bâ-temessük üç yüz seksen guruş hakkını mûrisimiz müteveffâ-i mezbûr kable’l-ahz ve’l-istîfâ vefât etmekle bize mevrûs olmuş idi deyü asâleten ve kefâletlerine binâʼen mesfûrûndan daʻvâya tasaddî onlar dahi bi’l-külliye inkâr ve baʻde vukūʻ-ı münâzaʻa tavassut-ı muslihûn ile daʻvâ-yı mezkûreden mesfûrûn ile an-inkâr yüz altmış guruş bedel-i makbûza sulh-i sahîh ile sulh olup mâʻadâ mütâlebesinden mesfûrûnun ve ahâlî-i karye-i mezbûrûndan cümlesinin zimmetlerini ibrâ ve iskāt eyledikde onlar dahi bedel-i sulh deyü medfûʻları olan meblâğ[-ı mezbûr] yüz altmış guruş mütâlebesinden mezbûretân Hatice ve Sâliha’nın zimmetlerimizi ibrâ ve iskāt ve katʻı’n-nizâʻ eyledikleri baʻde’l-ikrâr ve’t-tasdîk tescîl olunup mübâşirleri Lütfullah Çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ min-şehri Cemâziyelevvel sene ihdâ ve sittin ve miʼe ve elf.