Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 325 Hüküm no: 511 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arap Mehmed Paşa Vakfı’ndan olup Ayşe Hatun’un mutasarrıf olduğu menzilin satışına izin verilmemesi Maʻrûz-ı dâʻî-i Devlet-i aliyyeleridir ki; Fındıklı nâm mahalde Ayas Paşa Mahallesi sâkinlerinden sâhib-i arzuhâl Ali b. el-Hâc Osman ve el-Hâc İbrahim b. Abdullah nâm kimesneler meclis-i şerʻ-i hatîrde Medîne-i Ebâ Eyüb el-Ensârî’de Bıçakcı Ferhad Mahallesiʼnde sâkin derûn-ı arzuhâlde mezkûr Mehmed b. Mustafa nâm kimesne muvâcehesinde bundan akdem mezbûr Mehmed Arap Ahmed Paşa Vakfı’ndan Firuzat Mahallesiʼnde vâkiʻ maʻlûmü’l-hudûd vâlidesi Âişe’nin <> vakıf menzili bize ferâgat etmek üzere bir defʻa bâ-temessük altı yüz ve bir defʻa hâric ez-temessük yüz elli cemʻan yedi yüz elli guruş medfûʻum olup hâlâ menzil-i vakf-ı mezbûru ferâgat etmeyip izn-i mütevellî ile ferağı üzerimize henüz tahrîr olunmamağla meblâğ-ı medfûʻ-ı mezbûr reddolunmak üzere taleb ederiz deyü baʻde’d-daʻvâ mezbûr Mahmud dahi fi’l-hakīka hâl vech-i muharrer üzeredir deyü ikrâr ve iʻtirâf etmeğin mûcebince meblâğ-ı mezbûr yedi yüz elli guruşu müddeʻiyân-ı mezbûrâna redd ü teslîme mezbûr Mahmud’a tenbîh-birle tescîl olunup huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ min-Cemâziyelevvel sene ihdâ ve sittin ve miʼe ve elf.