Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 326 Hüküm no: 512 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un borcunu ödemesi Maʻrûz-ı dâʻî-i Devlet-i aliyyeleridir ki; Sâhib-i arzuhâl Ali b. Mustafa nâm kimesne dîvân-ı âlî çavuşlarından el-Hâc Süleyman kulları mübâşeretiyle Medîne-i Ebâ Eyüb el-Ensârî’de Baba Haydar Mahallesi sâkinelerinden meclis-i şerʻa ihzâr olunan derûn-ı arzuhâlde mastûrü’l-ism Fâtıma bt. Mehmed nâm hatun ile terâfuʻ etdiklerinde işbu deyn temessükü mûcebince cihet-i karz-ı şerʻîden üç yüz guruş mezbûre Fâtıma zimmetinde hakkı olup hatta cihet-i mezbûreden zimmetinde meblâğ-ı mezbûr üç yüz guruş edâsı lâzım deyni olduğunu şuhûd muvâcehesinde kirâren [ve] mirâren ikrâr dahi etmiş iken taleb eyledikde edâda taʻallül eder baʻde’s-suâl alıverilmek matlûbumdur deyü baʻde’d-daʻvâ ve’l-istintak mezbûre Fâtıma Hatun husûs-ı merkūmu bi’l-külliye münkire olmağla müddeʻî-i mezbûr Ali vech-i muharrer müddeʻâsını lede’t-tezkiye adâletleri zâhir olup mahmiye-i İstanbul’da Kumkapı dâhilinde Şeyh Ferhad Mahallesi sükkânından Hüseyin Ağa b. Ebûbekir ve Nişancı Atik Mahallesi sükkânından es-Seyyid Mehmed Ağa b. es-Seyyid Osman nâm kimesneler şehâdetleriyle vech-i şerʻî üzere münkire-i mezbûre Fâtıma Hatun muvâcehesinde isbât etmeğin mûcebince meblâğ-ı mezbûr üç yüz guruşu müddeʻî-i mezbûr Ali’ye edâ ve teslîm etmek üzere mezbûre Fâtıma Hatun’a tenbîh-i şerʻî-birle tescîl olunup mübâşir-i merkūm iltimâsıyla huzûr-ı âlîlerine iʻlâm olundu. Bâkī fermân men-hazret-i veliyyü’l-emrindir. Fi’l-yevmi’l-ışrîn min-şehri Cemâziyelevvel li-sene ihdâ ve sittin ve miʼe ve elf.