Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 333 Hüküm no: 529 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Kasım’ın vârislerinin kendilerine intikal eden çiftlik ve bahçelerin gasbedildiği yolundaki iddiâlarını ispatlayamadıkları Maʻrûz-ı dâʻî-i Devlet-i aliyyeleridir ki; Derûn-ı arzuhâlde mezkûr müteveffâ el-Hâc Kasım’ın verâseti zevce-i menkūhası Hatice Hatun ile sulbî oğulları İbrahim ve Musa’ya baʻde’l-inhisâr mezbûr Musa ile zevce[si] mezbûre Hatice nâm hatun arzuhâlde mastûrü’l-ism Sinan nâm kimesne ile terâfuʻalarında mûrisimiz müteveffâ-i mezbûrdan müntakil ve mevrûs Miço çiftliğinde vâkiʻ hubûbât ve hınta ve alef ve sâir âlât-ı çift ve çiftlik-i mezbûr kurbünde vâkiʻ bahçe derûnunda mevcûd eşcâr-ı müsmire ve magrûs sebzevât ve âlât-ı muʻâyyene-i mevcûddan dokuz sehm hissemize merkūm Sinan fuzûlî ve bi-gayr-ı hakkın vazʻ-ı yed etmekle mevcûddan aynını müstehlike ise kıymet-i mislinden hisse-i irsiyemizi taleb ederiz deyü daʻvâ eylediklerinde mezbûr Sinan dahi işbu yedimde olup Haslar Nâibi Mustafa Efendi imzâsıyla mümzâ ve hatt u hatemini hâvî mübâyaʻa hücceti nâtık olduğu üzere müddeʻî-i merkūm Musa’nın hâl-i suğrunda vâlidesi vasiyesi mezbûre Hatice Hatun derûn-ı çiftlikde ve bahçede mevcûd tereke-i menkūleden mezrûʻâtda hisselerini asâleten ve vesâyeten yüz elli guruş semen-i makbûza bana beyʻ u temlîk ben dahi baʻde’l-iştirâ ve’t-temellük ve’l-kabûl ol vechile mülk-i müşterâmdır deyü defʻ ve bir kıtʻa hüccet-i şerʻiyye ibrâz etmeğin müddeʻiyyân-ı mezbûrân mazmûn-ı hücceti baʻde’l-inkâr mezbûr Sinan dahi defʻini lede’t-tezkiye şehâdetleri makbûle olan mahmiye-i İstanbul’da Topkapısı dâhilinde sâkin Ebûbekir b. Süleyman ve İbrahim Beşe b. Hüseyin nâm kimesneler şehâdetleriyle hüccet-i şerʻiyyenin mazmûnunu muvâcehelerinde vech-i şerʻî üzere isbât etmekle mezbûrân Hatice ve Musa bî-vech muʻârazadan menʻ olundukları Eyüb mahkemesinde tescîl olunup mübâşirleri Ali Çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî min-Cemâziyelâhir li-sene ihdâ ve sittin ve miʼe ve elf.