Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 336 Hüküm no: 537 Orijinal metin no: [53b-10] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsteryo v. Beraş’a âid olduğu tespit olunan beygirin iâdesi Maʻrûz-ı dâʻî-i Devlet-i aliyyeleridir ki; Kirâcı tâifesinden hâmilü’l-iʻlâm İsteryo v. Beraş meclis-i şerʻde bahçıvan tâifesinden Petro v. Hristo ve şerîki Nikola v. Yorgo nâm zimmîler muvâcehelerinde işbu meclisde müşâhed bir reʼs al doru alnı sakar, beş seneden beri mülküm olan bargirim vilâyet-i Rumeli’nde Pirlepe kazâsında Garip Marko demekle arîf cebelde gezer iken on üç ay mukaddem mülkümden zâyiʻ ve işbu merkūmân yedlerinde buldum bi’l-istihkāk taleb ederim deyü daʻvâ onlar dahi on bir ay mukaddem bargir-i merkūmu İstanbul Et[meydanı’nda] ismi maʻlûmumuz olmayan kimesneden semen-i medfûʻa iştirâ etmiş idik deyü müddeʻî-i merkūmun ber-vech-i muharrer müddeʻâsını inkâr etmeleriyle merkūm İsteryo müddeʻâsını mübeyyine kirâcı tâifesinden olup beynlerinde adâletleri zâhir olan Nano v. Yorgo ve Angeli v. Niço nâm zimmîler şehâdetleriyle münkirân-ı merkūmân muvâcehelerinde alâ-vechi’ş-şerʻî isbât etmekle ba‘de’t-tahlîfü’ş-şer‘î mûcebiyle bargir-i merkūmu müddeʻî-i merkūma teslîme merkūmân Petro ve Nikola zimmîlere tenbîh-birle medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-âşir min-şehri Cemâziyelâhir li-sene ihdâ ve sittin ve miʼe ve elf.