Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 338 Hüküm no: 540 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Avanes v. Vartan’ın müteveffâ Hocazâde Mehmed Efendi’deki alacağının oğlu Mehmed Emin Efendi’den tahsîli Maʻrûz-ı dâʻî-i Devlet-i aliyyeleridir ki; Hâmilü’l-iʻlâm Terzi Avanes v. Vartan meclis-i şerʻde medîne-i Eyüb’de Düğmeciler Mahallesiʼnde sâkin iken bundan akdem vefât eden Hocazâde Mehmed Efendi’nin kebîr oğlu ve terekesine vazʻ-ı yedi mütehakkık olan Mehmed Emin muvâcehesinde müteveffâ-i mezbûr Hocazâde Mehmed Efendi zimmetinde üç seneden beri esvâb harcı ve üstâdiyemden baʻde külli hesap on iki guruş hakkım bâkī kalmağla taleb ederim deyü daʻvâ etdikde ol dahi husûs-ı mezkûru ikrâr lâkin meblâğ-ı mezbûr on iki guruşunu babam mezbûr Mehmed Efendi sıhhatinde tamamen teslîm eyledi deyü defʻ-i mezkûrunu beyândan âciz olmağla talebiyle merkūm Avanes zimmî ba‘de’t-tahlîfü’ş-şer‘î mûcebiyle meblâğ-ı mezbûr on iki guruşun edâsıyla mezbûr Mehmed Emin ilzâm olunduğu medîne-i mezbûr mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-ışrîn min-Cemâziyelevvel li-sene ihdâ ve sittin ve miʼe ve elf.