Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 343 Hüküm no: 553 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Kirkor’un es-Seyyid Osman b. es-Seyyid Ali’ye olan borcunu ödemesi Maʻrûz; Boğasici tâifesinden işbu bâʻisü’l-iʻlâm es-Seyyid Osman b. es-Seyyid Ali nâm kimesne Haçador v. Kirkor nâm zimmî ile Eyüb mahkemesinde meclis-i şerʻde terâfuʻlarında mesfûr Haçador zimmetinde benden iştirâ ve kabz eylediği boğasi bahâsından baʻde’l-hesâb on sekiz ve cihet-i karzdan üç cemʻan yirmi bir guruş hakkımdan bâkī on yedi guruş beş para hakkım olmağla taleb ederim deyü daʻvâ etdikde mesfûr Haçador dahi ber-vech-i muharrer ikrâr lâkin ben dahi deyn-i mezbûr mukābelesinde sekiz buçuk ay mukaddem on dört miskāl altun bilezik rehin vazʻ etmiş idim deyü tasaddî eylediği daʻvâsını müddeʻî-i mezbûr es-Seyyid Osman bi’l-vasiye inkâr etmeğin mezbûr Haçador müddeʻâsını isbât etmek üzere şâhide havâle olunup ve meblâğ-ı bâkī-i mezbûr on yedi guruş ile beş parayı müddeʻî-i mezbûr es-Seyyid Osman’a edâ ve teslîm eylemek üzere ikrârına binâʼen mesfûr Haçador zimmîye tenbîh-i şerʻî-birle baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 26 Cemâziyelâhir sene 1161