Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 348 Hüküm no: 564 Orijinal metin no: [55b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos zimmînin Mıgırdıç’a olan borcunu ödemesi Maʻrûz; İşbu hâmilü’l-iʻlâm Mıgırdıç nâm zimmî Bogos nâm zimmî ile terâfuʻlarında mesfûr Bogos zimmetinde beher dânesi yedişer akçeye olmak üzere yedimden müşterâ ve makbûz iki yüz sap karanfil bahâsından olan bin dört yüz akçeden bâkī altı yüz seksen akçe hakkımı <> taleb ederim deyü eylediği daʻvâ-yı mezbûresini mesfûr Bogos inkâr etmekle müddeʻî-i mezbûr ber-vech-i muharrer müddeʻâsını şuhûd-ı udûlden Feyzullah b. Bektaş ve Hasan b. Abdullah nâm kimesneler şehâdetleriyle vech-i şerʻî üzere baʻde’l-isbât mûcebince meblâğ-ı bâkī-i mezbûr altıyüz seksen akçeyi müddeʻî-i mezbûra edâ ve teslîme mesfûr Bogos’a tenbîh-birle Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 8 Recebi’l-ferd sene 1161