Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 349 Hüküm no: 565 Orijinal metin no: [55b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın yakaladığı Gürcü asıllı Müslüman kölenin İsmail Çelebi’ye âid olduğu Maʻrûz; Mahmiye-i İstanbul’da Kilid Hanı’nda ber-vech-i ticâret sâkin olan bâʻisü’l-iʻlâm İsmail Çelebi b. Mehmed nâm kimesne meclis-i şerʻde medîne-i Eyüb’de vâkiʻ avâbık ahzına meʼmûr olan Abdullah Ağa b. el-Hâc Halil nâm kimesne muvâcehesinde işbu meclis-i şerʻde müşâhed kara kaşlı kara gözlü Gürciyyetü’l-asl Müslimetü’l-mille Osman b. Abdullah târîh-i iʻlâmdan dört gün mukaddem mülkümden ibâk ve mezbûr Abdullah Ağa yedinde buldum bi’l-istihkāk taleb ederim deyü daʻvâ etdikde mezbûr Abdullah Ağa gulâm-ı mezbûr Osman dört gün mukaddem ibâken ahz eylediğini ikrâr ve ber-vech-i muharrer müddeʻî-i mezbûr İsmail’in gulâmı olduğunu inkâr etmekle müddeʻî-i mezbûr İsmail ber-vech-i muharrer müddeʻâsını Pîrî Paşa İmamı Hâfız Mustafa Efendi b. Ahmed ve es-Seyyid el-Hâc Mustafa b. es-Seyyid Mehmed nâm kimesneler şehâdetleriyle alâ-vech-i şerʻî isbât edip tâlib-i tahlîf <> olmamağla mûcebiyle gulâm-ı mezbûru müddeʻî-i mezbûr İsmail’e teslîme tenbîh olunduğu medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 4 min-Receb sene 1161