Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 349 Hüküm no: 566 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Kethüda ve arkadaşlarının iyi hallerine komşularının şahitlik ettikleri Maʻrûz; Haslar kazâsında vâkiʻ Topkapısı hâricinde İlyas Efendizâde Mahallesi’nde mutavattınlar olup ümerâ-yı Zülkadriye perâkendesi mukâtaʻâtı reʻâyâlarından yeniçeri cemâʻatinden Halil Kethüdâ b. Hüseyin ve Veli b. Hasan ve Derviş Mehmed b. Ali ve diğer Mehmed b. Ali ve Hüseyin b. İsa ve Molla Ali b. Ahmed, altı nefer kimesneler Eyüb mahkemesinde meclis-i şerʻa baʻde’l-ihzâr mukātaʻa-yı mezkûr emîni zâbitleri olan Mehmed Ağa b. el-Hâc Mustafa hâzır olduğu hâlde mezbûrların keyfiyet-i ahvâlleri suâl olundukda civâr mahalle-i âharda on on beş seneden beri mahalle-i mezbûrede mutavattınlar olup bir dürlü sû-i hareketleri sudûr ve zuhûr etmeyip kendi hâllerinde olup evzâʻ ve etvârlarından hoşnûduz deyü her birinin hüsn-i hâllerini mahalle-i mezbûre imamı efendi ve cemâʻat-i Müslimînden müseccelü’l-esâmî bî-garaz kimesneler alâ-vechi’s-sıhha haber verdiklerinden sonra mezbûrların nefislerine ve lede’l-mutâlebe huzûr-ı hükkâm-ı kirâma ihzârlarına zâbitler emîni mezbûr Mehmed Ağa kefîl olduğu tescîl olunup Vâlidesarayı Ustası es-Seyyid Ali Usta kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâdî aşer min-Recebi’l-ferd li-sene ihdâ ve sittin ve miʼe ve elf.