Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 350 Hüküm no: 567 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetci Provan’ın vârisleri arasında ortaya çıkan anlaşmazlığın giderildiği Maʻrûz; Medîne-i Eyüb’de Cezerî Kasımpaşa Mahallesi’nde mütemekkin şerbetci tâifesinden olup bundan akdem hâlik olan Provan v. Tanaş’ın mukırrun leh bi’n-neseb cihetinden bâ-hüccet-i şerʻiyye hasran vârisi olan sâhib-i arzuhâl Pano v. Vilkan nâm zimmî meclis-i şerʻde Boğdan kasabasında mürd olan Doka nâm hâlikin inhisârı mütehakkık veresesinden zevce-i metrûkesi Vasilike ve oğulları Yorgi ve Dimitri ve kızı Balaşa taraflarından zikr-i âtî husûsda ber-nehc-i şerʻ-i kavîm vekâleti Yamandi v. Yorgi ve Andon v. İstefan şehâdetleriyle sâbit olan Dimitri v. Hristodoli nâm zimmî muvâcehesinde mûrisim hâlik-i mesfûr Provan’ın sıhhatinde âhara ferâgat eylediği Eğrikapı hâricinde vâkiʻ vakıf menzilin ferağ bedelinden olmak üzere nakd üç yüz guruş ile vakıf menzilde bulunan kırk vakıyye bakır evânî ve bir semmur kürkü verese-i mesfûrûnun mevrûsu hâlik-i mesfûr Doka zimmîye bi-tarîkı’l-emâne verip kable’l-ahz hâlik ve bana mevrûs olmağla taleb ederim deyü baʻde’d-daʻvâ vekîl-i mezbûr Dimitri cevâbında müddeʻî-i mesfûr Mano zimmî bundan akdem husûs-ı mezbûr içün daʻvâya tasaddî ve altı guruş bedel-i makbûza baʻde’s-sulh ve’l-ibrâ ve vech-i meşrûh üzere bin yüz altmış bir senesi Cemâziyelâhiri’nin yirminci günü târîhinde sulh-i ibrâyı müşʻir bir kıtʻa temessük iʻtâ etmiş idi deyü baʻde’d-defʻ ve’l-inkâr vekîl-i merkūm defʻ-i meşrûhunu şuhûd-ı udûlle baʻde’l-isbât mûcebince müddeʻî-i mezbûr bî-vech muʻârazadan menʻ olundukdan sonra müddeʻî-i mesfûr Yano vekîl-i merkūm Dimitri malından şerʻan dört guruş kabz edip sulh ve ibrâsını nâtık târîh-i mezkûr ile müverraha mazmûnu temessükü dahi mukırr ve muʻterif olup husûs-ı mezkûra müteʻallika daʻvâ ve husûmetim yokdur deyü baʻde’l-ikrâr ve’t-tasdîk medîne-i mezbûre mahkemesinde tescîl olunduğu mübâşirleri el-Hâc Mustafa iltimâsıyla huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’l-hâmis min-Recebi’l-ferd li-sene ihdâ ve sittin ve miʼe ve elf.