Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 351 Hüküm no: 568 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu Hüseyin Çelebi Vakfı’ndan olup Korucu Mehmed Çelebi Mahallesi’nde bulunan kalhhâne içinde yapılan ilâve binâ ve duvarların kanunlara uygun olduğu Maʻrûz; Haslar kadıları nezâretinde olan evkāfdan derûn-ı arzuhâlde mezkûr merhûm Turşucu Hüseyin Çelebi Vakfı’ndan Ayvansaray kapısı hâricinde Korucu Mehmed Çelebi Mahallesi’nde deryâ kenarında vâkiʻ kalhhânenin icâreteyn ile mutasarrıfesi umdetü’l-muhadderât Şerife Rukiye bt. es-Seyyid Nakib Cafer Efendi’nin oğlu ve tarafından vekîl-i müseccel-i şerʻîsi müderrisîn-i kirâmdan es-Seyyid Ahmed Efendi’nin arzuhâli-birle sâdır olan fermân-ı âlişâna imtisâlen savb-ı şerʻ-i münîrden Başkâtib Mehmed Efendi hâssa miʻmârlarından Hüseyin b. Ömer ve el-Hâc Mustafa b. Ahmed nâm halîfeler ile kalhhâne-i mezbûrun üzerine varılıp mahalle-i mezbûre imamı Abdurrahman Efendi ve müezzini Mehmed Efendi ve cemâʻat-i Müslimîn huzûrlarında akd-i meclis-i şerʻ-i âlî etdikde vakf-ı mezbûrun kāimmakām mütevellîsi Müezzin Hüseyin Efendi hâzır olduğu halde zikr olunan kalhhâne derûnunda hulefâ-i miʻmârân-ı mezbûrân misâhaları üzere kāl olunan müşâhed mahallin tûlen on arzen beş bi-hesâb-ı terbîʻî elli zirâʻ sakfı beylik taban üzeri Bağdâdî sıva ve tahtında deryâ tarafında tûlen on, kadden üç terbîʻî otuz zirâʻ müceddeden taş duvar ve orta bölmesi kârgîr duvar ve bir taş senk vazʻ ve senk üzerine tûlen on, kadden beş, [56b] bi-hesâb-ı mezbûr elli zirâʻ-ı cedîd siper duvarı ve cevânib-i erbaʻada Horasânlı sıva olmak üzere binâ olundukda zarar-ı şerʻîsi olmayıp vech-i muharrer üzere binâ olunması enseb idiğini miʻmârân-ı mezbûrân ve ahâlî-i mahalleden müseccelü’l-esâmî yirmi bir nefer ve sâir bî-garaz Müslimîn dahi bi’l-ittifâk mahallinde haber verdiklerini mevlânâ-yı mezbûr baʻde’t-tahrîr maʻan baʻs olunan ümenâ-i şerʻle gelip alâ-vukūʻıhî inhâ eyledikleri taʻyîn olunan Duâcı Ahmed Çavuş kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 12 min-Recebi’l-ferd sene 1161