Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 354 Hüküm no: 574 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mitro v. Dano’nun emanet olarak bıraktığı yapağının bedeli olan yedi yüz akçeyi teslîm aldığı Maʻrûz; Vilâyet-i Rumeli’nde Filibe kazâsından Mitro v. Dano meclis-i şerʻde Havâss-ı aliyye’ye tâbiʻ Cebeci karyesinden hâmilü’s-sifr Hürmüz v. Nikola ve Hristo v. Durmuş nâm zimmîler muvâcehelerinde târîh-i iʻlâmdan bir sene mukaddem merkūm zimmîlere emânet vazʻ eylediğim otuz beş vakıyye yapağının aynı mevcûd olmayıp âhara teslîm ile istihlâk eylediklerini merkūmân baʻde’l-ikrâr tazmîn sadedinde iken bi’t-terâzi beher vakıyyesi yirmişer akçeden cemʻan yedi yüz akçeyi mezbûrlar bana defʻ u teslîm ben dahi yedlerinden baʻde’l-ahz ve’l-kabz katʻan merkūmlar ile daʻvâ ve husûmetim yokdur deyü ikrârını mezbûrlar dahi baʻde’t-tasdîk medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fî 12 min-Recebi’l-ferd sene 1161