Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 354 Hüküm no: 575 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Kasım’ın vârislerine intikal eden Çiço çiftliğindeki hisselerin satışıyla ilgili anlaşmazlığın giderildiği Maʻrûz; Havâss-ı refîʻa kazâsına [tâbiʻ] Topçular karyesinde fevt olan el-Hâc Kasım’ın verâseti zevce-i menkûhası Hatice ile sulbî oğulları İbrahim ve Musa’ya baʻde’l-inhisâr müteveffâ-i mezbûrun veresesinden zevcesi ve zâtı taʻrîf-i şerʻî ile muʻarrefe olan mezbûre Hatice ile merkūm Musa meclis-i şerʻde derûn-ı arzuhâlde mezkûrü’l-ism Sinan nâm kimesne muvâcehesinde mûrisimiz müteveffâ-i mezbûrdan müntakil ve mevrûs Çiço çiftliğinde vâkiʻ hayvanat ve hınta ve alef ve sâir âlât-ı çift ve çiftlik-i mezkûr kurbünde vâkiʻ bahçe derûnunda mevcûd eşcâr-ı müsmire ve magrûs sebzevât ve âlât-ı mu’ayyene-i mevcûdeden dokuz sehm hissemize merkūm Sinan fuzûlî ve bi-gayr-ı hakkın vazʻ-ı yed etmekle mevcûd ise aynı, müstehlike ise kıymet-i mislinden hisse-i irsiyemizi taleb eyleriz deyü daʻvâ eylediklerinde merkūm Sinan cevâbında merkūm Musa’nın hâl-i sugūrunda vâlidesi ve vasiyesi mezbûre Hatice Hatun ber-vech-i muharrer hisselerini asâleten ve vesâyeten yüz elli yedi guruş semen-i makbûza bana beyʻ ve temlîk ben dahi baʻde’l-iştirâ ve’t-temellük ve’t-tesellüm ve’l-kabûl ol vechile benim mülk-i müşterâm olduğunu nâtık hüccet-i şerʻiyyenin mazmûnu bundan akdem muvâcehelerinde vech-i şerʻî üzere isbât ve yedime iʻlâm-ı şerʻiyye vermiş idi deyü beynlerinde bu vechile münâzaʻât-ı kesîre vukūʻundan sonra tavassut-ı muslihûn ile yirmi guruş bedel-i makbûza sulh-i sahîh ile sulh olup husûs-ı mîrâsa ve târîh-i kitâba gelince mûrisleri müteveffâ-i mezbûrun bi’l-cümle terekesine müteʻallika âmme-i daʻvâdan merkūm Sinan’ın zimmetini ibrâ ve katʻ-ı nizâʻ eylediklerinden sonra beyʻ-i mezbûru ve mazmûn-ı iʻlâmı mezbûrân Hatice ve Musa’dan her biri ikrâr ve iʻtirâf eyledikleri tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 12 min-Recebi’l-ferd sene 1161