Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 359 Hüküm no: 587 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pretamoz v. Sava’nın memleketi olan Niğde’nin Frenk karyesindeki ev, eşyâ ve üç kıtʻa bağını Manat v. Kostantin’e satıp ücretini aldığının tespit olunduğu Maʻrûz; Sâhib-i arzuhâl Pretamoz v. Sava nâm zimmî derûn-ı arzuhâlde mezkûr olup zikr-i âtî emlâke vazʻ-ı yedi sâbit olan Manat v. Kostantin nâm zimmî muvâcehesinde vilâyet-i Anadolu’da Niğde kazâsına tâbiʻ Frenk nâm karyede vâkiʻ inde’l-ahâlî maʻlûmü’l-hudûd mülk menzil ile eşyâ-i maʻlûme-i memlûkemi ve yine karye-i mezbûrede her birinin hudûdları lede’l-ahâlî maʻlûm kürûmları mülk üç kıtʻa bağlar bâ-hüccet-i mübâyaʻa mülküm olduğu hâlde beyʻ-i bâtt-ı sahîh-i şerʻî ve safka-i vâhide ile üç yüz üç guruşa mesfûr Manat zimmîye bin yüz altmış senesi Zilkaʻdesi gurresinde Havâss-ı aliyye nâibi müderrisîn-i kirâmdan fazîletlü Ebûbekir Efendi dâʻîleri huzûrlarında beyʻ ve temlîk ve mahallinde zabt u tasarrufa taslît ol dahi baʻde’l-iştirâ ve’t-temellük ve’l-kabûl semen-i emlâk olan meblâğ-ı mezbûr üç yüz üç guruşun iki yüz on üç [guruş] mütâlebesinden mesfûr Manat zimmînin zimmetini ibrâ ve iskāt edip emlâk-i mezkûre mülk-i müşterâsı olmuşdur deyü baʻde’l-ikrâr ve’t-tasdîk nâib-i mûmâ-ileyh dahi husûs-ı mezbûru nâtık târîh-i mezkûr ile müverrah hatemini hâvî ibrâz olunan bir kıtʻa iʻlâm tahrîr ve iʻtâ etmiş idi el-hâletü hâzihî emlâk-i mebîʻ-i mezbûr semeninden bâkī doksan guruş dahi mesfûr Manat zimmî yedinden tamamen ahz u kabz eyledim deyü mazmûn-ı iʻlâmı ve semen-i bâkī meblâğ-ı mezbûr doksan guruşu kabzını baʻde’l-ikrâr ve’t-tasdîk arzuhâlinde tahrîr olunduğu üzere eylediği daʻvâsı bî-vech olmağla muʻârazadan mesfûr Pretamoz zimmî menʻ-birle tescîl olunup mübâşiri iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 20 min-Recebi’l-ferd sene 1161