Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 360 Hüküm no: 588 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Kemal ile Sütçü Marko arasında süt alış-verişinden meydana gelen ihtilâfın giderildiği Maʻrûz; Derûn-ı arzuhâlde ismi mastûr Kemal nâm Yahûdi hâmil-i arzuhâl sütcü tâifesinden Marko nâm zimmî muvâcehesinde bundan akdem iʻlâm olunduğu üzere rûz-ı Hızır’dan mukaddem altı yüz doksan iki vakıyye ve rûz-ı Hızır’dan sonra iki bin üç yüz vakıyye leben mesfûr Marko yedinden iştirâ ve kabz eylediği mesfûr Kemal ikrârıyla ve süt vermek içün peşin mesfûr Kemal yedinden yüz seksen yedi buçuk guruş ve karzdan on beş guruş makbûzu mesfûr Marko ikrârıyla sübûtundan sonra bi’t-terâzi beynlerinde evvelâ yedişer ve sâniyen beşer buçuk akçeden hesapları üzere makbuz-ı meblâğ-ı mecmûʻ-ı mezbûrdan baʻde’t-tekābuz mezbûr Kemal’e bâkī kırk beş guruş edâsı lâzım deyni olduğunu mesfûr Marko ikrâr ve iʻtirâfından sonra mesfûr Marko târîh-i iʻlâmdan hesapları üzere süt vermekle meblâğ-ı bâkī-i mezbûr kırk beş guruşa hesaplaşmak üzere kethüdâları ve ustaları ber-vech-i muharrer beynlerini tevfîk ve katʻ-ı nizâʻ etdikleri Mehmed Çavuş iltimâsıyla tescîl olunup huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 22 min-Recebi’l-ferd sene 1161