Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 361 Hüküm no: 589 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İşi gücü olmayıp gasb ve ihtilâs ile geçinen şahısların araştırılıp yakalanarak memleketlerine gönderilmeleri İzzetlü Bostancıbaşı Ağa; Bî-kisb ü kâr serserî geşt ü güzâr ve ibâdullahın emvâl ve eşyâsını gasb ve ihtilâsa derkâr olan şekāvet-pîşeler Âsitâne-i aliyye’de teftîş ve tefahhus olundukda bazıları tahlîs-i girîban dâʻiyesiyle Haslar ve Sütlüce ve ol havâlîye firâr ve baʻzı mahallerde hufyeten meks ve firâr eyledikleri inhâ ve ihbâr olunduğu cihetden ol makūle eşhâs ve erâzil alâ-vechi’t-taharrî teftîş ve tefahhus ve bulundukları mahalde ahz ve ele getirilip geri vilâyetlerine iʻâde ve ircâʻları mühim ve muktezî olmağla imdi tarafınızdan mukdim ve kâr-güzâr ve müstakīmü’l-etvâr haseki mübâşereti ve Haslar kādısı fazîletlü efendi maʻrifetiyle medîne-i Haslar ve Sütlüce ve havâlîsinde olan mahaller gereği gibi teftîş ve tefahhus olunup bî-kes ve kâr işi ve gücü olmayıp serserî geşt ü güzâr eyleyen eşhâs her ne mahalde bulunur ise bulundukları mahalde bi-eyy-i vechin-kân ahz ve ele getirilip isimleri ve vilâyetleri tasrîhi ile dikkat ve vilâyetlerine iʻâde ve tesyîre ihtimâm ve dikkat ve avk ve tehirden ittikā ve mücânebet eyleyesin deyü buyruldu. Fî 19 Receb sene 1161