Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 361 Hüküm no: 590 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in alacaklı olduğu yolundaki iddâsını ispatlayamadığı Maʻrûz; Mahmiye-i İstanbul’da Aksaray’da Davudpaşa Mahallesi ahâlîsinden el-Hâc Mehmed b. Ebûbekir nâm kimesne işbu sâhibü’l-iʻlâm Ebûbekir Beşe b. el-Hâc Mustafa ile Eyüb mahkemesinde meclis-i şerʻde terâfuʻlarında târîh-i iʻlâmdan bir buçuk sene mukaddem mahmiye-i mezbûrede Kızıl Maslak nâm <> sûkda kendi dükkânımda karz kırk sekiz guruş mezbûr Ebûbekir Beşe’ye verip ol dahi baʻde’l-kabz ber-vech-i muharrer ikrâr dahi etmiş idi taleb ederim deyü daʻvâ etdikde ol dahi karz cihetinden olmayıp şart-ı müfsid ile havâle cihetindendir deyicek müddeʻî-i mezbûr el-Hâc Mehmed dahi fi’l-hakīka müddeʻâm olan meblâğ karz cihetinden olmayıp mechûlü’l-kıyme bilezik bahâsı olmak üzere mechûlü’l-aded meblâğ devr ile deynimdir deyü ikrâr eyledi deyü müddeʻî-i mezbûrun daʻvâsından münâkısı inde’ş-şerʻ zâhir ve takrîri üzere şart-ı müfsid ile havâlenin adem-i sıhhati mütehakkık olmağla müddeʻî-i mezbûr el-Hâc Mehmed bi-gayr-ı vech-i şerʻî muʻârazadan menʻ olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 23 min-Recebi’l-ferd sene 1161 İkinci deftere geçildi