Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 362 Hüküm no: 591 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sima bt. Asvadorʼun alacaklı olduğu yolundaki iddiâsında yalancı şahitler tuttuğu Maʻrûz-ı dâʻî-i Devlet-i aliyyeleridir ki; Hâmile-i arzuhâl Sima bt. Asvador nâm Nasrâniye Havâss-ı aliyye kazâsında Nitroz nâm karyede derûn-ı arzuhâlde ismi mastûr olan Kasko v. Peço nâm zimmî ile meclis-i şerʻ-i hatîrde terâfuʻlarında gāib ani’l-meclis Nikola v. Dimitri zimmetinde cihet-i karzdan üç yüz elli [guruş] hakkım olup târîh-i iʻlâmdan on üç ay [mukaddem] Balat iskelesinde mesfûr Nikola’dan meblâğ-ı mezbûru taleb eylediğimde meblâğ-ı deyn-i mezbûr üç yüz elli guruşun edâsına tarafeynden bi’l-emr ve’l-kabûl işbu mesfûr Kasko zimmî kefîl ve zâmin olmuş idi kefâletine binâʼen meblâğ-ı mezbûru taleb ederim deyü daʻvâ etdikde mesfûr Kasko husûs-ı müddeʻâ-yı mezkûreyi bi’l-külliye baʻde’l-inkâr müddeʻiye-i mezbûre Sima’dan ber-vech-i muharrer müddeʻâsına beyyine taleb olundukda meclis-i şerʻa ikāmet eylediği İstanbul’da Kahriye Mahallesi mütemekkinlerinden Rum tâifesinden Kürkcü Foti v. Yorgi ve Ermeni tâifesinden Sandalcı Abram v. Haçok nâm zimmîler şehâdet edip şâhidân-ı mesfûrânın keyfiyet-i ahvâlleri esnâ-i tezkiyelerinde hevâdârlarından birkaç kimesneler cemʻiyyet etdikleri mahâll-i mahsûsda makbûlü’ş-şehâde deyü haber lâkin mütemekkin oldukları sâlifü’z-zikr Kahriye Mahallesi İmamı Şânî Mustafa Efendi ve cemâʻatlerinden Üveys Çelebi b. Süleyman ve Ahmed Ağa b. Mustafa ve Hasan Çelebi b. Mehmed ve Mustafa Çelebi b. Osman ve Salih Çelebi b. Ali ve Bektaş Çelebi b. Hasan ve Mustafa Çelebi b. Mahmud nâm kimesneler ile civârında Çakır Ağa Mahallesi imamı Hâfız <<İbrahim>> İsmail Efendi ve cemâʻatlerinden Müʼezzin Molla Halil b. el-Hâc Mehmed ve Molla Abdullah b. Mustafa ve Baba Ali ve İbrahim Beşe nâm kimesneler ve yine civârında Kasım Gönânî Mahallesi imamı Hâfız Mehmed Efendi ve cemâʻatlerinden Müʼezzin Süleyman b. Osman ve Mehmed Ağa b. Mustafa ve Abdullah Çelebi ve Halil Çelebi b. el-Hâc İbrahim üç mahalle ahâlîsinden her birleri işbu şâhidân-ı mesfûrân Kürkcü Foti ve Sandalcı Abram zimmîler mahalleye yakında gelip dâimâ şehâdetlerde gezip şehâdet kisb ü kâr ve âdet-i müstemireleri ve şâhid-i zûr olduklarına vukūf-ı tammımız olmuşdur deyü keyfiyet-i ahvâllerini ve kezâlik mukaddem mahallede olup hâlâ âhar mahallede sâkine şahsı rüʼyetimiz ile maʻlûmumuz olan işbu müddeʻiye-i mezbûre Sima Nasrâniye dahi şerîre ve müddeʻâsı hilâf ve onun dahi keyfiyeti cümlemizin maʻlûmudur deyü haber verdiklerinde şâhidler cerh olunup şâhid-i âhar ikāmeti mümkün olmadığından mâʻadâ fî-nefsi’l-emr daʻvâ-yı mezbûre tezvîr olduğu zâhir ve nümâyân olmağla müddeʻiye-i mezbûre Sima muʻârazadan menʻ-birle tescîl olunup mübâşiri Atmaca Süleyman Çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ ve’l-ışrîn min-Receb sene 1161