Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 363 Hüküm no: 593 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Beşe’nin el-Hâc Mustafa’ya olan borcunu ödemesi Maʻrûz; Medîne-i Hazret-i Ebâ Eyüb el-Ensârî’de kasablar kethüdâsı işbu sâhibü’l-iʻlâm el-Hâc Mustafa nâm kimesne Kumkapı taşrasında kanâdârı olan Abdulkādir Beşe nâm kimesne ile baʻde’t-terâfuʻ işbu kanâdâr Abdulkādir Beşe zimmetinde yedimden iştirâ ve makbûz maʻlumü’l-kıyye lahmın bahâsından baʻde’l-hesâb otuz altı bin beş yüz otuz iki akçe hakkım olup hatta cihet-i mezkûreden ol mikdâr bana deyni olduğunu ikrâr ve işhâd dahi etmekle meblâğ-ı mezbûru taleb ederim deyü eylediği daʻvâ-yı mezkûresini mezbûr Abdulkādir Beşe baʻde’l-inkâr müddeʻî-i mezbûr el-Hâc Mustafa ber-vech-i muharrer müddeʻâsını şuhûd-ı udûlden kasab ustalarından es-Seyyid Mehmed b. es-Seyyid Hasan ve Osman b. Hasan nâm kimesneler şehâdetleriyle vech-i şerʻî üzere baʻde’l-isbât mezkûr kandar Abdulkādir Beşe cihet-i mezbûreden ol mikdâr edâsı lâzım zimmetimde deynimdir deyü ikrâr ve iʻtirâf dahi etmekle mûcebince meblâğ-ı mezbûr otuz altı bin beş yüz otuz iki akçeyi müddeʻî-i mezbûr el-Hâc Mustafaʻya edâ ve teslîm eylemek üzere kandar-ı mezbûr Abdulkādir Beşe’ye tenbîh-i şerʻî-birle Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 27 min-Recebi’l-ferd sene 1161