Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 366 Hüküm no: 599 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız eden es-Seyyid Osman ve karısı Ayşe’nin bulundukları mahalleyi terk edecekleri Maʻrûz; Medîne-i Eyüb’de Evlice Baba Mahallesi’nden ashâbü’l-iʻlâm İmam Ömer Efendi ve Müezzin Abdülkerim Halîfe ve Osman Ağa ve Molla Ali ve Hüseyin ve el-Hâc Mehmed ve Molla Mehmed ve Mehmed Ağa ve Ahmed Ağa ve İbrahim Çelebi ve Molla Osman ve Ali Bey ve Molla Abdülbâki ve Ali Beşe ve İsmail Çelebi ve Ahmed Ağa ve sâir cemm-i gafîr kimesneler meclis-i şerʻde yine mahalle-i mezbûrede sâkin es-Seyyid Osman nâm kimesne muvâcehesinde mezbûr es-Seyyid Osman’ın zevcesi Acemiyyü’l-asl Âişe bed-zebân ve dil-azâr olmağla emn ü rahatımız olmadığına binâʼen mezbûr es-Seyyid Osman zevcesiyle maʻan mahallemizden ihrâc olunmasını iltimâs eyleriz deyü iştikâ eylediklerinde mezbûr es-Seyyid Osman dahi zevcesi mezbûre Âişe ile târîh-i iʻlâmdan üç güne değin mahalle-i âhara nakl etmek üzere taʻahhüd eylediği medîne-i mezbûre mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 27 min-Recebi’l-ferd sene 1161